ចាប់តាំងពីជម្លោះចាប់ផ្តើម ក្នុងតំបន់ហ្គាហ្សា អាមេរិក ធ្វើវេតូដំណោះស្រាយ របស់អង្គការសហប្រជាជាតិ ជាលើកទី៣

UN៖ សហរដ្ឋអាមេរិក បានវេតូដំណោះស្រាយក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃអង្គារ ដែលព្រាងដោយអាល់ហ្សេរីនឹងជំរុញឱ្យមានបទឈប់បាញ់ “ភ្លាមៗ” នៅតំបន់ហ្គាហ្សាស្ទ្រីប ដោយអះអាងថាវិធានការនេះនឹងជះឥទ្ធិពលអវិជ្ជមានដល់កិច្ចពិភាក្សារវាងអ៊ីស្រាអែល និងក្រុមសកម្មប្រយុទ្ធហាម៉ាស។

នេះជាលើកទី៣ ហើយសម្រាប់សហរដ្ឋអាមេរិកដែលប្រើអំណាចវេតូរបស់ខ្លួន នៅលើស្ថាប័នសំខាន់នៃស្ថាប័នពិភពលោកចាប់តាំងពីការវាយប្រហារកាលពីថ្ងៃទី០៧ ខែតុលា ប្រឆាំងនឹងអ៊ីស្រាអែល ដោយពួកសកម្មប្រយុទ្ធហាម៉ាស។
ទីក្រុងវ៉ាស៊ីនតោន ដែលគាំទ្រអ៊ីស្រាអែលក្នុងជម្លោះ និងអនុគ្រោះដល់ការចរចាដោយផ្ទាល់បានច្រានចោលដំណោះស្រាយពីរផ្សេងទៀត ដែលនឹងជំរុញឱ្យមានការផ្អាកជម្លោះនៅតំបន់ហ្គាហ្សាកាលពីចុងឆ្នាំមុន។

ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បានឲ្យដឹងក្នុងសម័យប្រជុំមួយមុនការបោះឆ្នោតថា “ការទាមទារឱ្យមានបទឈប់បាញ់ជាបន្ទាន់ដោយគ្មានលក្ខខណ្ឌដោយគ្មានកិច្ចព្រមព្រៀង ដែលតម្រូវឱ្យក្រុមហាម៉ាសដោះលែងចំណាប់ខ្មាំងនឹងមិននាំមកនូវសន្តិភាពយូរអង្វែងនោះទេ”។ ផ្ទុយទៅវិញ វាអាចពង្រីកការប្រយុទ្ធគ្នារវាងក្រុមហាម៉ាស និងអ៊ីស្រាអែល។

ដំណោះស្រាយនេះនឹងទាមទារឱ្យមាន “បទឈប់បាញ់មនុស្សធម៌ជាបន្ទាន់” រវាងភាគីជម្លោះនៅតំបន់ហ្គាហ្សាស្ទ្រីប ក៏ដូចជាការអំពាវនាវឱ្យមានការដោះលែងចំណាប់ខ្មាំងទាំងអស់ជាបន្ទាន់ និងដោយគ្មានលក្ខខណ្ឌ។

ឯកអគ្គរដ្ឋទូតនៃប្រទេសអាល់ហ្សេរីប្រចាំអង្គការសហប្រជាជាតិ លោក Amar Bendjama ដែលបានដាក់ចេញសេចក្តីសម្រេចនេះ បានឲ្យដឹងថា “ការសម្រេចចិត្តខុសនៅថ្ងៃនេះ នឹងមានការចំណាយលើតំបន់របស់យើង និងពិភពលោករបស់យើងនៅថ្ងៃស្អែក” ។ លោកបានបន្តថា ហើយការចំណាយនេះនឹងមានអំពើហិង្សា និងអស្ថិរភាព។

សមាជិកក្រុមប្រឹក្សាចំនួន ១៣នាក់ក្នុងចំណោម ១៥ រូបបានបោះឆ្នោតគាំទ្រ រួមទាំងប្រទេសជប៉ុនផងដែរ ខណៈដែលចក្រភពអង់គ្លេសបានអនុប្បវាទ។ ដំណោះស្រាយទាមទារឱ្យមានការបោះឆ្នោតបញ្ជាក់ដោយសមាជិកយ៉ាងតិច ៩រូប ដើម្បីអនុម័ត និងសម្រាប់សមាជិកអចិន្ត្រៃយ៍ទាំងប្រាំរបស់ក្រុមប្រឹក្សា ដើម្បីអនុវត្តសិទ្ធិវេតូរបស់ខ្លួន៕