ឯកឧត្តមអភិសន្តិបណ្ឌិត ស សុខា ៖ ឆន្ទៈដ៏ធំរបស់រាជរដ្ឋាភិបាលកម្ពុជា គឺមិនឱ្យទឹកដីបាត់បង់សូម្បីតែ ១សង់ទីម៉ែត្រ!

ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ថា ឆន្ទៈរបស់រាជរដ្ឋាភិបាល ក្រោមការដឹកនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា គឺមិនឱ្យទឹកដីបាត់បង់សូម្បីតែ ១សង់ទីម៉ែត្រ ហើយក៏មិនមានចិត្តទៅដណ្ដើមទឹកដីរបស់អ្នកណាឡើយ។

ការថ្លែងបែបនេះក្នុងឱកាសដែលឯកឧត្តមអភិសន្តិបណ្ឌិត អញ្ជើញជាអធិបតីពិធីសម្ពោធដាក់ឱ្យប្រើប្រាស់ជាផ្លូវការនូវអគារ ១ខ្នង កម្ពស់២ជាន់ ទំហំ ២៤ម៉ែត្រx១០ម៉ែត្រ ស្មើ ១៤បន្ទប់ សមិទ្ធផលនានា និងសំណេះសំណាលជាមួយកងកម្លាំងនគរបាលជាតិ នៃស្នងការដ្ឋាននគរបាលខេត្តកំពង់ចាម។

ក្នុងន័យដដែលនេះ ឯកឧត្តមអភិសន្តិបណ្ឌិត បានគូសបញ្ជាក់ថា ជាច្រើនអាណត្តិមកហើយ មិនមានថ្នាក់ដឹកនាំណាម្នាក់បណ្តែតបណ្តោយ ឬចង់ឱ្យបាត់បង់ទឹកដីរបស់ខ្លួនឯងនោះទេ ទន្ទឹមនេះដើម្បីថែរក្សាទឹកដី និងព្រំដែនឱ្យបានគត់មុត និងគង់វង្ស ប្រជាពលរដ្ឋគ្រប់រូប គឺមានភាគហ៊ុនដូចគ្នា ក្នុងការចូលរួមថែរក្សាបូរណៈភាពទឹកដី សូម្បីតែមួយមីលីម៉ែត្រ ដោយមិនមែនជាកតាព្វកិច្ចរបស់ថ្នាក់ដឹកនាំណាម្នាក់ឡើយ ពោលគឺជាកិច្ចការរួម។

ឯកឧត្តមអភិសន្តិបណ្ឌិត ក៏បានលើកឡើងអំពីការបំផុសធ្វើបដិវត្តន៍ពណ៌បំបែកបំបាក់ ជាច្រើនលើកច្រើនសារ ជាក់ស្តែងនាព្រឹត្តិការណ៍១៨ សីហា២០២៤ នាពេលចុងក្រោយនេះ គឺត្រូវបានបរាជ័យទាំងស្រុង ដោយសារប្រជាពលរដ្ឋមានការយល់ដឹងច្រើន និងឆ្លងកាត់បទពិសោធដ៏ជូរចត់រួចមកហើយ ផ្ទុយទៅវិញការដឹកនាំប្រកបដោយប្រតិភាណនៅនិតិកាលថ្មីនេះ កំពុងតែនាំកម្ពុជាឱ្យមានសុខសន្តិភាព និងក្លាយទៅជាប្រទេសដែលមានចំណូលខ្ពស់នៅឆ្នាំ២០៥០។

ថ្លែងនៅក្នុងឱកាសនោះដែរ ឯកឧត្តមអភិសន្តិបណ្ឌិត ក៏បានលើកឡើងអំពីតួនាទី និងភារកិច្ចរបស់មន្ត្រីកងកម្លាំង នៅពេលដែលគ្រងឯកសណ្ឋានហើយ គឺមិនមែនជាម្ចាស់របស់ប្រជាពលរដ្ឋនោះទេ ហើយក៏មិនមែនជាអ្នកបញ្ជា ពោលគឺជាអ្នកបំរើប្រជាពលរដ្ឋ ថែរក្សាសេចក្តីសុខ ប្រកបដោយការទទួលខុសត្រូវ រហូតចប់ម៉ោងធ្វើការ។

ស្របនឹងឱកាសបុណ្យចូលឆ្នាំថ្មីប្រពៃណីជាតិខ្មែរ ជិតឈានចូលមកដល់ប្រមុខក្រសួងមហាផ្ទៃ ក៏បានណែនាំដល់ថ្នាក់ដឹកនាំខេត្តទាំងអស់មិនអាចសម្រាកបានទេ ត្រូវចូលថែរក្សាការពារប្រជាពលរដ្ឋរាប់លាននាក់ ដែលឆ្លងកាត់ខេត្តរបស់ខ្លួន។ ឯកឧត្តមបានបន្តទៀតថា ជាក់ស្តែងគិតត្រឹមម៉ោងនេះ នៅច្រកព្រំដែនអន្តរជាតិកម្ពុជា-ថៃ ពលរដ្ឋមួយចំនួនកំពុងធ្វើដំណើរវិលត្រឡប់ ដើម្បីអបអរពិធីបុណ្យជាតិដ៏ធំ ដែលជាប្រពៃណីទំនៀមទម្លាប់ខ្មែរ និងទាមទាឱ្យថ្នាក់ដឹកនាំទាំងអស់ចូលរួមបំរើសេវាមួយនេះឱ្យបានរលូន។

ក្នុងនាមរាជរដ្ឋាភិបាល និងក្នុងនាមក្រសួងមហាផ្ទៃ ឯកឧត្តមអភិសន្តិបណ្ឌិត បានថ្លែងអំណរគុណ គណៈបញ្ជាការឯកភាពខេត្ត មន្ត្រីនគរបាល កងរាជអាវុធហត្ថខេត្ត ក្នុងការលះបង់អស់កម្លាំងកាយចិត្ត ក្នុងការថែរក្សាសុវត្ថិភាពជូនប្រជាពលរដ្ឋ និងការពារនូវសមិទ្ធផលដែលសម្រេចបានគ្រប់កាលៈទេសៈ ក្រោមការចង្អុលបង្ហាញរបស់រាជរដ្ឋាភិបាល។

ដើម្បីជាការតបស្នងចំពោះការខិតខំប្រឹងប្រែងប្រមុខក្រសួងមហាផ្ទៃ ក៏បានគូសបញ្ជាក់ថា រាជរដ្ឋាភិបាលបានជំរុញ និងអនុវត្តវិធានការគន្លឹះជាច្រើនអាទិភាព ព្រមទាំងដាក់ចេញនូវយុទ្ធសាស្ត្របញ្ចកោណដំណាក់កាលទី១ ក្នុងន័យជំរុញការអភិវឌ្ឍសេដ្ឋកិច្ចសង្គម ដើម្បីឈានទៅសម្រេចឱ្យបាននូវចក្ខុវិស័យ កម្ពុជាឆ្នាំ២០៥០ ឱ្យក្លាយទៅជាប្រទេសកំពុងអភិវឌ្ឍ៕