ហេតុការណ៍បាញ់ប្រហារមួយ អតីតបុគ្គលិកក្រុមហ៊ុនដឹកជញ្ជូនក្រិក សម្លាប់មនុស្ស ៣នាក់

ក្រិក៖ អតីតបុគ្គលិក ដែលពោរពេញដោយកំហឹងឆាបឆួលម្នាក់ បានបាញ់សម្លាប់ប្រធានក្រុមហ៊ុនដឹកជញ្ជូនក្រិក និងមនុស្ស ២នាក់ផ្សេងទៀត មុនពេលធ្វើអត្តឃាត នៅឯការិយាល័យរបស់ក្រុមហ៊ុន នាទីក្រុងអាតែន កាលពីថ្ងៃម្សិលមិញនេះ បើតាមការឲ្យដឹងពីអ្នកនាំពាក្យនគរបាល ។

នគរបាល រថយន្តពន្លត់អគ្គិភ័យ និងរថយន្តសង្គ្រោះបន្ទាន់ ត្រូវបានដាក់ឲ្យប្រចាំការនៅខាងក្រៅការិយាល័យរបស់ក្រុមហ៊ុនដឹកជញ្ជូន European Navigation នៅជាយក្រុង Glyfada ភាគខាងត្បូង។ អ្នកសារព័ត៌មានរបស់ទីភ្នាក់ងារសារព័ត៌មាន Reuters នៅកន្លែងកើតហេតុ បានរាយការណ៍ថា កងកម្លាំងប្រឆាំងភេរវកម្មបានចូលទៅក្នុងអគារនេះ ដោយបានជម្លៀសមនុស្សចេញពីខាងក្នុង។

លោកស្រី Konstantina Dimoglidou អ្នកនាំពាក្យនគរបាល ដែលមិនបញ្ចេញឈ្មោះជនរងគ្រោះ បាននិយាយថា ក្នុងចំណោមអ្នកស្លាប់ គឺម្ចាស់ក្រុមហ៊ុន European Navigation។ សាច់ញាតិរបស់សពបានប្រាប់អ្នកសារព័ត៌មាននៅកន្លែងកើតហេតុថា សាច់ញាតិរបស់ខ្លួន បានព្យាយាមដណ្ដើមកាភ្លើងពីខ្មាន់កាំភ្លើង។

លោកស្រី Dimoglidou បាននិយាយថា ខ្មាន់កាំភ្លើងដែលជាអតីតបុគ្គលិកវ័យ ៧៦ឆ្នាំ ត្រូវបានរកឃើញថា បានស្លាប់នៅក្នុងកន្លែងផ្សេងទៀតរបស់អគារឆ្ងាយពីជនរងគ្រោះ ដែលមានបុរស ២នាក់ និងស្ត្រីម្នាក់។ លោកស្រីបានបន្ថែមថា អាវុធមួយដើមត្រូវបានរកឃើញនៅក្បែរអ្នកបាញ់ប្រហារ ដែលប្រហែលជាបាញ់សម្លាប់ខ្លួនឯង។

នគរបាលដែលបានបិទតំបន់នោះបាននិយាយថា ពួកគេកំពុងស៊ើបអង្កេតលើឧទ្ទវហេតុនេះ៕