អាមេរិក និងអង់គ្លេស ព្រួតដៃគ្នាដាក់ទណ្ឌកម្មថ្មី លើក្រុមហាម៉ាស ដោយកំណត់គោលដៅ ផ្ទេរប្រាក់ពីអ៊ីរ៉ង់ទៅកាន់តំបន់ហ្កាហ្សា

បរទេស៖ សហរដ្ឋអាមេរិក បានដាក់ទណ្ឌកម្មលើក្រុមមន្ត្រីហាម៉ាស និងសមាជិកនៃក្រុមជីហាដឥស្លាមប៉ាឡេស្ទីន (PIJ) ដែលធ្វើការផ្ទេរប្រាក់ពីអ៊ីរ៉ង់ទៅកាន់តំបន់ហ្កាហ្សា កាលពីថ្ងៃអង្គារ ។ សេវាប្តូរប្រាក់លីបង់ដែលជួយសម្រួលដល់ការផ្ទេរប្រាក់ ក៏ត្រូវបានដាក់ទណ្ឌកម្មផងដែរ។

ក្រសួងរតនាគារ បានប្រកាសកាលពីថ្ងៃអង្គារថា ទណ្ឌកម្មកំពុងត្រូវបានសម្របសម្រួលជាមួយ ចក្រភពអង់គ្លេស ហើយមានគោលបំណងការពារប្រព័ន្ធហិរញ្ញវត្ថុអន្តរជាតិ ពីការរំលោភបំពាន ដោយក្រុមសកម្មប្រយុទ្ធហាម៉ាស និងអ្នកផ្តល់ជំនួយរបស់ពួកគេ ។

ទណ្ឌកម្ម រារាំងអង្គភាពគោលដៅមិនឲ្យចូលប្រើប្រាស់ទ្រព្យសម្បត្តិ និងគណនីធនាគាររបស់សហរដ្ឋអាមេរិក ខណៈពេលដែលរារាំងពួកគេពីការរកស៊ីជាមួយជនជាតិអាមេរិកផងដែរ ។

ទណ្ឌកម្មនេះ ជាការដាក់ទណ្ឌកម្មលើកទីបី គិតចាប់តាំងពីការវាយប្រហារដ៏ឃោរឃៅ របស់ក្រុមហាម៉ាសកាលពីថ្ងៃទី៧ ខែតុលា ទៅលើអ៊ីស្រាអែល ដែលបានសម្លាប់មនុស្សប្រហែល ១.២០០នាក់ និងជាង ២៤០នាក់ ត្រូវចាប់ជាចំណាប់ថ្នូរ។ ទណ្ឌកម្មពីមុន ត្រូវបានប្រកាសនៅថ្ងៃទី១៨ ខែតុលា និងថ្ងៃទី២៧ ខែតុលា ដោយកំណត់ទៅលើក្រុមប្រតិបត្តិករហាម៉ាស និងអ្នកសម្របសម្រួលហិរញ្ញវត្ថុរបស់ខ្លួន ។

លោកស្រី ចាណេត យ៉េឡែន (Janet Yellen) រដ្ឋមន្ត្រីរតនាគារ បាននិយាយថា ទណ្ឌកម្មនេះ នឹងធានាថា សហរដ្ឋអាមេរិក នៅតែបន្តបដិសេធនូវសមត្ថភាពរបស់ខ្លួន ក្នុងការប្រមូល និងប្រើប្រាស់មូលនិធិ ដើម្បីធ្វើការវាយប្រហារ៕