GDP របស់ចិន IMF ព្យាករណ៍ថា នឹងកើនឡើងក្នុងរង្វង់ ៥,៤ ភាគរយនៅឆ្នាំ២០២៣

ចិន៖ ផលិតផលក្នុងស្រុកសរុប (GDP) របស់ប្រទេសចិន ត្រូវបានព្យាករណ៍ថា នឹងកើនឡើង ៥,៤ភាគរយនៅឆ្នាំ២០២៣ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ ក្នុងសេចក្តីថ្លែងការណ៍របស់មូលនិធិរូបិយវត្ថុអន្តរជាតិ (IMF) បានឲ្យដឹង ។

លោក Gita Gopinath សេចក្តីថ្លែងការណ៍ដែលធ្វើឡើងដោយនាយករងទីមួយរបស់ IMF បន្ទាប់ពីដំណើរទស្សនកិច្ចទៅកាន់ប្រទេសចិនថា “សេដ្ឋកិច្ចចិន កំពុងស្ថិតនៅលើផ្លូវ ដើម្បីសម្រេចបាននូវគោលដៅកំណើនឆ្នាំ២០២៣ របស់រដ្ឋាភិបាល ដែលឆ្លុះបញ្ចាំងពីការស្ទុះងើបឡើងវិញក្រោយជំងឺកូវីដ” ។

លោក Sonali Jain-Chandra ប្រធានបេសកកម្ម សម្រាប់ប្រទេសចិន ដឹកនាំក្រុម IMF បានទៅទស្សនកិច្ចប្រទេសចិនចាប់ពីថ្ងៃទី 26 ខែតុលា ដល់ថ្ងៃទី០៧ ខែវិច្ឆិកា ដើម្បីធ្វើការពិភាក្សាលើការប្រឹក្សា មាត្រា ៤ ឆ្នាំ២០២៣ ។

ក្រុមការងារបេសកកម្មបានពិភាក្សាគ្នា ក្នុងន័យស្ថាបនាជាមួយមន្ត្រីជាន់ខ្ពស់របស់រដ្ឋាភិបាល ធនាគារប្រជាជនចិន តំណាងវិស័យឯកជន និងអ្នកសិក្សា ដើម្បីផ្លាស់ប្តូរទស្សនៈ ស្តីពីការរំពឹងទុក និងហានិភ័យសេដ្ឋកិច្ច វឌ្ឍនភាពកំណែទម្រង់ និងបញ្ហាប្រឈម និងការឆ្លើយតបគោលនយោបាយ ។

លោក Gopinath នៅក្នុងសន្និសីទសារព័ត៌មានមួយ នៅឯការបញ្ចប់បេសកកម្មកាលពីថ្ងៃអង្គារ ក្នុងទីក្រុងប៉េកាំង បានលើកឡើងថា ការព្យាករណ៍នេះឆ្លុះបញ្ចាំងពីការពិនិត្យឡើងវិញ នូវការកើនឡើងនៃ ០,៤ភាគរយនៅក្នុងឆ្នាំ២០២៣ ទាក់ទងទៅនឹងទស្សនវិស័យសេដ្ឋកិច្ចពិភពលោក ដែលបានចេញផ្សាយ នៅក្នុងខែតុលា ដោយសារតែទិន្នផលត្រីមាសទី៣ ខ្លាំងជាងការរំពឹងទុក និងការប្រកាសគោលនយោបាយថ្មីៗ ។

ក្នុងសេចក្ដីថ្លែងការណ៍បានឲ្យដឹងថា “ភាពជាអ្នកដឹកនាំ ដែលកំពុងកើនឡើងរបស់ចិន ក្នុងការដោះស្រាយបញ្ហាប្រឈមជាសាកល ដូចជាវិបត្តិអាកាសធាតុ និងវិបត្តិបំណុល មានសារៈសំខាន់សម្រាប់ប្រទេសចិន និងពិភពលោក។ តួនាទីរបស់ចិន ក្នុងការគាំទ្រការរៀបចំរចនាសម្ព័ន្ធបំណុលនៅក្នុងប្រទេស ដែលមានចំណូលទាប និងងាយរងគ្រោះត្រូវបានស្វាគមន៍ ហើយការបន្តត្រូវការជាចាំបាច់ សម្រាប់ការបន្ធូរបន្ថយបំណុលទាន់ពេលវេលា ។

អនុប្រធាននាយកដ្ឋានអាស៊ី និងប៉ាស៊ីហ្វិករបស់ IMF លោក Thomas Helbling បានប្រាប់សន្និសីទសារព័ត៌មានថា ឱកាសរបស់ប្រទេសចិន នាពេលអនាគតកើតឡើងពីមូលដ្ឋានគ្រឹះដ៏ល្អ រួមទាំងធនធានមនុស្ស និងបរិយាកាសអាជីវកម្មដ៏ល្អផងដែរ ៕