ការតវ៉ាពីប្រជាជនអ៊ីស្រាអែល នៅខាងក្រៅគេហដ្ឋានរបស់នាយករដ្ឋមន្ត្រី Netanyahu

អ៊ីស្រាអែល៖ នៅខាងក្រៅគេហដ្ឋានរបស់ លោកនាយករដ្ឋមន្ត្រី អ៊ីស្រាអែល Benjamin Netanyahu នគរបាលបានរារាំងក្រុមបាតុករដែលធ្វើបាតុកម្ម កាលពីថ្ងៃសៅរ៍ ទី ៤ ខែវិច្ឆិកា ខណៈមាន​កំហឹង​ផ្ទុះ​ឡើង​កាន់​តែ​ខ្លាំង ចំពោះការបរាជ័យ​ ដែល​នាំឱ្យ​មាន​ការ​វាយ​ប្រហារ​ដ៏​សាហាវ ​កាល​ពី​ខែ​មុន​ដោយ​ក្រុម​ខ្មាន់​កាំភ្លើង ហាម៉ាស លើសហគមន៍ជុំវិញតំបន់ហ្កាហ្សា ។

ហ្វូងមនុស្សរាប់​រយ​នាក់​បាន​រុញ​ច្រាន​រនាំង​ របស់​នគរបាល​ជុំវិញ​គេហដ្ឋានរបស់លោក Netanyahu ព្រមទាំងគ្រវីទង់ជាតិអ៊ីស្រាអែលពណ៌ខៀវ និងស ក្នុងក្រុងហ្សេរ៉ុយសេឡឹម(Jerusalem) ។

ការ​តវ៉ា​ដែល​បាន​កើត​ឡើង​ស្របពេលមានការស្ទង់មតិមួយ ដែលបង្ហាញពី​ប្រជាជនអ៊ីស្រាអែល​ច្រើនជាង​ ៣​ភាគ៤ជឿថាលោក Netanyahu គួរតែលាលែងពីតំណែងនោះ ដោយគូស​បញ្ជាក់​អំពី​កំហឹង​សាធារណៈ ដែលកំពុងរាលដាលចំពោះមេដឹកនាំនយោបាយ និងសន្តិសុខរបស់ខ្លួន ។

លោក Netanyahu  រហូតមកដល់ពេលនេះ មិនទាន់ទទួលយកការទទួលខុសត្រូវផ្ទាល់ខ្លួន ចំពោះ​ការ​បរាជ័យដែលនាំឱ្យមានការវាយប្រហារដ៏គួរឱ្យភ្ញាក់ផ្អើល ដែលបានឃើញ​ខ្មាន់កាំភ្លើង​ហាម៉ាស​រាប់​រយ​នាក់ បានសម្រុកចូលភាគខាងត្បូងអ៊ីស្រាអែលកាលពីថ្ងៃទី៧ ខែតុលា ដោយបាន​សម្លាប់​មនុស្ស​ជាង ១.៤០០នាក់ និងចាប់មនុស្សយ៉ាងហោចណាស់ ២៤០នាក់ជាចំណាប់ថ្នូរផងដែរ ៕