អាមេនីទៅពឹងផ្អែកប្លុកសេរី ជំនួសការដកខ្លួនពីរុស្ស៊ី
អាមេនី៖ ប្រទេសនៅតំបន់អាស៊ីកណ្តាលអាមេនីដែលជាសម្ព័ន្ធមិត្តជាប្រពៃណីជាមួយមហាអំណាចរុស្ស៊ីតាំងពីយូរមកហើយ ក្រោយពីបានការប្រកាសបដិសេធមិនធ្វើម្ចាស់ផ្ទះរៀបចំសមយុទ្ធយោធារបស់អង្គការសន្ធិសញ្ញាសន្តិសុខសមូហភាព (CSTO) ដែលមានរុស្ស៊ីជាបងធំនោះ ទំនងផ្តាច់ខ្លួនចេញពីការពឹងផ្អែកលើរុស្ស៊ីសម្រាប់ការធានាសន្តិសុខរបស់ខ្លួន ខណៈដែលប្រទេសនេះមានជម្លោះបង្ហូរឈាមជាមួយប្រទេសក្បែរខាងអាស៊ែបៃហ្សង់។
ការជូនដំណឹងរបស់ប្រទេសអាមេនីដល់ទីក្រុងម៉ូស្គូ អំពីផែនការរបស់ខ្លួនអនុវត្តតាមយុត្តាធិការរបស់តុលាការអន្តរជាតិទីក្រុងឡាអេ ដែលនឹងអាចចាប់ខ្លួនលោក វ្ល៉ាឌីមៀ ពូទីន ប្រធានាធិបតីរុស្ស៊ីដែលរងការចោទប្រកាន់ឧក្រិដ្ឋកម្មសង្គ្រាមប្រព្រឹត្តនៅប្រទេសអ៊ុយក្រែន ក្នុងពេលណាមួយដែលលោកពូទីនជាន់ទឹកដីអាមេនី។
ភាគីរុស្ស៊ីបានជំទាស់យ៉ាងខ្លាំង ទោះបីមានការចោទប្រកាន់បែបនោះក្តី។ ប្រព័ន្ធផ្សព្វផ្សាយរុស្ស៊ីបានរាយការណ៍នៅថ្ងៃអាទិត្យកន្លងមកនេះថា ប្រទេសអាមេនីបានពិភាក្សាជាមួយរុស្ស៊ីអំពីផែនការរបស់ខ្លួនក្នុងការជ្រកក្រោមយុត្តាធិការរបស់តុលាការឧក្រិដ្ឋកម្មអន្តរជាតិ។
នេះបើយោងតាមរ៉យទ័រថា រដ្ឋាភិបាលអាមេនីបាននិយាយថា ខ្លួនកំពុងផ្លាស់ប្តូរដើម្បីមកនៅក្រោមយុត្តាធិការរបស់តុលាការដែលជំរុញឱ្យទីក្រុងម៉ូស្គូព្រមានអំពី «ផលវិបាកធ្ងន់ធ្ងរ»ប្រសិនបើវាកើតឡើង។
លោក Nikol Pashinyan នាយករដ្ឋមន្ត្រីអាមេនី បានប្រាប់សារព័ត៌មាន Politico ផ្សាយកាលពីថ្ងៃទី ១៣ កញ្ញាថា ខ្លួនលែងពឹងរុស្ស៊ីជាអ្នកធានាសន្តិសុខសម្រាប់ខ្លួនតទៅទៀតហើយ បើទោះបីជាជម្លោះទំនងកើតជាថ្មីជាមួយអាស៊ែបៃហ្សង់ក៏ដោយ។
កាលពីខែមីនា តុលាការនៅទីក្រុងឡាអេបានចោទប្រកាន់លោកពូទីន ពីឧក្រិដ្ឋកម្មសង្គ្រាមពីបទនិរទេសកុមាររាប់រយនាក់ ឬច្រើននាក់ដោយខុសច្បាប់ពីអ៊ុយក្រែនដែលជាការអះអាងមួយដែលត្រូវបានថ្កោលទោសដោយវិមានក្រឹមឡាំងថា ជាបក្ខពួកគ្មានន័យ និងខឹងសម្បារ។
ដីកាតុលាការក្រុងឡាអេនេះតម្រូវឱ្យរដ្ឋសមាជិកទាំង ១២៣ ដែលបានចុះហត្ថលេខីត្រូវចាប់ឃុំខ្លួននិងផ្ទេរលោក ពូទីន ប្រសិនបើលោកពូទីនធ្វើដំណើរទៅកាន់ទឹកដីរបស់ពួកគេ។ លោក ពូទីន បានបោះបង់ការចូលរួមប្រជុំជាអន្តរជាតិជាច្រើន ដូចជាកិច្ចប្រជុំកំពូល BRICS នៅអាហ្រ្វិកខាងត្បូងកាលពីខែសីហាជាដើម ដែលជាផ្នែកមួយនៃការបញ្ចៀសពីការចាប់ខ្លួន ឬភាពចម្រូងចម្រាសដល់ម្ចាស់ផ្ទះ។
ឯកអគ្គរដ្ឋទូតនៃក្រសួងការបរទេសអាមេនី លោក Edmon Marukyan បាននិយាយថា ប្រទេសអាមេនី បានបញ្ជូន «សំណើ» លើបញ្ហានេះទៅកាន់ទីក្រុងម៉ូស្គូ។ TASS បានដកស្រង់សម្តីលោកទូតថា៖«កិច្ចប្រជុំមួយត្រូវបានធ្វើឡើង ហើយដំណើរការកំពុងដំណើរការ» បើតាមទីភ្នាក់ងារសារព័ត៌មាន TASS បានរាយការណ៍។
ទំនាក់ទំនងទ្វេភាគីរវាងទីក្រុងម៉ូស្គូនិងទីក្រុងយ៉េរ៉េវ៉ាន់ (Yerevan) បានធ្លាក់ចុះកាន់តែដុនដាបខ្លាំងក្នុងប៉ុន្មានខែថ្មីៗនេះ ជុំវិញអ្វីដែលយ៉េរ៉េវ៉ាន់និយាយថា គឺជាការបរាជ័យរបស់ទីក្រុងម៉ូស្គូ ក្នុងការរក្សាបានពេញលេញនូវសន្ធិសញ្ញាបទឈប់បាញ់ឆ្នាំ ២០២០ ដែលទីក្រុងម៉ូស្គូធ្វើជាអ្នកសម្របសម្រួលរវាងអាមេនី និងអាស៊ែបៃហ្សង់ ឱ្យបញ្ចប់សង្គ្រាមរបស់ពួកគេលើ Nagorno-Karabakh ដែលជាតំបន់ដែលមានប្រជាជនអាមេនីនៃអាស៊ែបៃហ្សង់។
កាលពីសប្តាហ៍មុន អាមេនីលុបចោលសមយុទ្ធយោធារួមដែលមានវត្តមានរុស្ស៊ី ប៉ុន្តែបានធ្វើសមយុទ្ធយោធាជាមួយយោធាអាមេរិកទៅវិញ នេះយោងតាមការផ្សាយរបស់ទីភ្នាក់ងារព័ត៌មានតួកគី Anadolu៕