រដ្ឋអាជ្ញាលីប៊ីបើកការស៊ើបអង្កេត ជុំវិញការធ្វេសប្រហែស កំពុងដំណើរការបន្ទាប់ពីមានការបាក់ទំនប់

លីប៊ី៖ ការស៊ើបអង្កេត កំពុងដំណើរការ ជុំវិញការធ្វេសប្រហែស បន្ទាប់ពីទំនប់ចំនួន២ បានបាក់ នៅទីក្រុង Derna របស់ប្រទេសលីប៊ី ដែលនាំឲ្យមានគ្រោះមហន្តរាយទឹកជំនន់ ដែលបានសម្លាប់មនុស្សរាប់ពាន់នាក់ បើតាមរដ្ឋអាជ្ញាសាធារណៈ បាននិយាយកាលពីថ្ងៃសុក្រ ទី១៥ ខែកញ្ញា ឆ្នាំ២០២៣កន្លងទៅ។

លោក Al-Siddiq Al-Sour ថ្លែងទៅកាន់ប្រព័ន្ធផ្សព្វផ្សាយ ដោយនិយាយថា បច្ចុប្បន្នការិយាល័យរបស់លោកកំពុងស៊ើបអង្កេតលើការធ្វេសប្រហែស ដែលអាចកើតមានពីអាជ្ញាធរមូលដ្ឋាន ក៏ដូចជារដ្ឋាភិបាលបន្តបន្ទាប់គ្នា ដើម្បីកំណត់ថា តើអ្នកណាជាអ្នកទទួលខុសត្រូវ ចំពោះកង្វះការថែទាំទំនប់។

សូមបញ្ជាក់ថា ទឹកជំនន់ដ៏ធំ ដែលបណ្ដាលមកពីព្យុះដ៏ខ្លាំងមួយ បានបំបាក់ទំនប់ កាលពីយប់ថ្ងៃអាទិត្យសប្ដាហ៍កន្លងទៅ និងបានហូរកាត់ភាគខាងកើតទីក្រុង Derna។ ចំនួនអ្នកស្លាប់ ដែលត្រូវបានបញ្ជាក់ដោយមន្ត្រី ក្នុងគ្រោះទឹកជំនន់នេះ មានភាពខុសគ្នា ដោយចំនួនទាំងអស់ គឺរាប់ពាន់នាក់ ហើយរាប់ពាន់នាក់ទៀតស្ថិតនៅក្នុងបញ្ជីអ្នកបាត់ខ្លួន៕