ការគ្រោងសង់កំពែងជុំវិញក្រុងក្នុងរដ្ឋធានីកៀវ ទប់ទល់ការវាយលុករបស់រុស្ស៊ី

អ៊ុយក្រែន៖ រដ្ឋធានីអ៊ុយក្រែនមួយនេះ គ្រោងនឹងសាងសង់កំពែងបន្ថែមទៀត ដោយសារហានិភ័យនៃការវាយប្រហាររបស់រុស្ស៊ីនៅតែមាន បើតាមអាជ្ញាធរក្រុងកៀវ បាននិយាយកាលពីថ្ងៃព្រហស្បតិ៍ ទី៣១ ខែសីហា ឆ្នាំ២០២៣ កន្លងទៅនេះ ។

យើងនៅចាំថាបានថា កងកម្លាំងរុស្ស៊ី បានព្យាយាមដណ្តើមយករដ្ឋធានីនេះ ក្នុងដំណាក់កាលដំបូងនៃការលុកលុយពេញទំហឹងរបស់ពួកគេ ដែលចាប់ផ្តើមក្នុងខែកុម្ភៈ ឆ្នាំ២០២២ ប៉ុន្តែបានដកថយវិញ បន្ទាប់ពីប្រឈមនឹងការតស៊ូយ៉ាងខ្លាំងក្លារបស់អ៊ុយក្រែន។

រដ្ឋធានីកៀវ អភិបាលក្រុងលោក Vitali Klitschko និយាយថា នឹងបែងចែកប្រាក់ ២១.៧៤ លានដុល្លារអាមេរិកដើម្បីសាងសង់កំពែង និងសម្រាប់តម្រូវការយោធាបន្ទាន់ផ្សេងទៀត។

ជាមួយគ្នានេះ លោក Serhiy Popko ប្រធានរដ្ឋបាលយោធា បាននិយាយនៅលើកម្មវិធីផ្ញើសារ Telegram ថា “ទីក្រុងកៀវ គឺជាគោលដៅអាទិភាពទី ១ សម្រាប់សត្រូវ” ។

នៅខណៈ កងកម្លាំងរុស្ស៊ី បានកាន់កាប់តំបន់ភាគខាងកើត និងភាគខាងត្បូងនៃប្រទេស ហើយមិនទាន់មានសញ្ញាថា ពួកគេគ្រោងវាយលុកបន្ថែមទៀតលើរដ្ឋធានីអ៊ុយក្រែននោះទេ ។ ប៉ុន្តែទីក្រុងកៀវ ត្រូវបានកំណត់គោលដៅម្តងហើយម្តងទៀត ដោយការវាយប្រហារមីស៊ីល និងយន្តហោះគ្មានមនុស្សបើក ខណៈការវាយប្រហារចុងក្រោយបំផុតកាលពីថ្ងៃពុធ ទី៣០ខែសីហា បានសម្លាប់មនុស្ស ២ នាក់ ៕