មានអ្វីចម្លែក! អស់រយៈពេលជាច្រើនទសវត្សរ៍ អង្គការណាតូ បែរជាចាប់ផ្តើមសមយុទ្ធយោធា ដ៏ធំបំផុតមិនធ្លាប់មាន

ព្រុចសែល៖ “សមយុទ្ធ Steadfast Defender 2024” ដែលជាសមយុទ្ធយោធា ដ៏ធំបំផុតរបស់ខ្លួន អង្គការសន្ធិសញ្ញាអាត្លង់ទិកខាងជើង (ណាតូ) ក្នុងរយៈពេលជាច្រើនទសវត្សរ៍ បានចាប់ផ្តើមកាលពីថ្ងៃពុធកន្លងមកនេះ។

អង្គការណាតូ ក៏បានឲ្យដឹងថា “កប៉ាល់ចុះចត USS Gunston Hall (LSD 44) បានចាកចេញ ពី Norfolk រដ្ឋ Virginia សហរដ្ឋអាមេរិក ហើយបន្ទាប់ពីប្រតិបត្តិការ ជាបន្តបន្ទាប់នឹងចាប់ផ្តើម ដំណើរឆ្លង កាត់មហាសមុទ្រអាត្លង់ទិក” ដោយបន្ថែមថា “កប៉ាល់របស់ព្រះមហាក្សត្រកាណាដា Charlottetown នឹងចាកចេញពី Halifax, Nova Scotia, Canada សម្រាប់អឺរ៉ុបនៅចុងខែនេះ”។

សមយុទ្ធនេះនឹងធ្វើឡើងនៅទីតាំងជាច្រើន ដោយសមយុទ្ធដែលពាក់ព័ន្ធដំណើរការរហូតដល់ថ្ងៃទី៣១ ខែឧសភា នេះបើយោងតាមអង្គការណាតូ។ “វានឹងបង្ហាញថា ណាតូ អាចធ្វើ និងទ្រទ្រង់ប្រតិបត្តិការពហុដែនដ៏ស្មុគស្មាញក្នុងរយៈពេលជាច្រើនខែ ឆ្លងកាត់រាប់ពាន់គីឡូម៉ែត្រ ពីភាគខាងជើងឆ្ពោះទៅ អឺរ៉ុបកណ្តាល និងខាងកើត និងក្នុងលក្ខខណ្ឌណាមួយ”។

លោក Alexander Grushko អនុរដ្ឋមន្ត្រីការបរទេសរុស្ស៊ី បានប្រាប់ទីភ្នាក់ងារសារព័ត៌មាន RIA កាលពីថ្ងៃអាទិត្យថា ទំហំនៃការធ្វើសមយុទ្ធនេះគឺជា “ការវិលត្រឡប់ដែលមិនអាចដកហូតវិញបាន” របស់ប្លុកនេះ ចំពោះគម្រោងសង្រ្គាមត្រជាក់។

សមយុទ្ធនេះ ត្រូវបានប្រកាស កាលពីថ្ងៃព្រហស្បតិ៍សប្តាហ៍មុន ដោយមេបញ្ជាការសម្ព័ន្ធមិត្តកំពូល របស់អង្គការណាតូអឺរ៉ុប Christopher Cavoli ហើយនឹងឃើញទាហានប្រហែល ៩ម៉ឺននាក់មកពីសមាជិក ៣១ របស់ណាតូ និងស៊ុយអែតចូលរួម ៕