ជប៉ុន៖ សាជីវកម្មក្ស័យធន កើនឡើងនៅឆ្នាំ២០២៣ ចំពេលមានកង្វះកម្លាំងពលកម្ម និងអតិផរណា

បរទេស៖ ចំនួននៃការក្ស័យធនរបស់សាជីវកម្ម នៅក្នុងប្រទេសជប៉ុនបានកើនឡើងនៅឆ្នាំ២០២៣ មានរហូតល់ ៨.០០០ ជាលើកដំបូងក្នុងរយៈពេល ៤ ឆ្នាំ ដោយសារការកើនឡើងនៃតម្លៃសម្ភារៈ និងការកើនឡើងប្រាក់ឈ្នួលធ្វើឱ្យប៉ះពាល់ដល់ប្រាក់ចំណូលសាជីវកម្ម នេះបើតាមទីភ្នាក់ងារស្រាវជ្រាវឥណទានមួយបានលើកឡើង កាលពីថ្ងៃម្សិលម៉្ងៃ ។

ទីភ្នាក់ងារ Tokyo Shoko Research បាននិយាយថា ការបរាជ័យអាជីវកម្មជាមួយនឹងបំណុលយ៉ាងហោចណាស់ ១០ លានយ៉េន (៦៨ លានដុល្លារ) បានកើនឡើង ៣៥,២ ភាគរយពីឆ្នាំមុន ដល់ ៨,៦៩០ សម្រាប់ការកើនឡើងប្រចាំឆ្នាំជាប់ៗគ្នាទីពីរ នេះយោងតាមសារព័ត៌មាន Kyodo News ចេញផ្សាយឲ្យដឹងកាលពីថ្ងៃទី១៥ ខែមករា ឆ្នាំ២០២៤ ។

ការកើនឡើងនៃថ្លៃពលកម្មដោយសារកង្វះកម្លាំងពលកម្ម ជាពិសេសក្នុងឧស្សាហកម្មសំណង់ និងការកើនឡើងនៃតម្លៃវត្ថុធាតុដើម និងថាមពល បានបង្កផលប៉ះពាល់ដល់ក្រុមហ៊ុន ដែលក្រុមហ៊ុនមួយចំនួនបានរងបន្ទុករួចហើយដោយការសងប្រាក់កម្ចីដែលផ្តល់ក្រោមកម្មវិធីជំនួយសង្គ្រោះជំងឺរាតត្បាតរបស់រដ្ឋាភិបាល។

ឧស្សាហកម្មទាំង ១០ ដែលគ្របដណ្តប់ដោយការស្ទង់មតិឃើញថា មានការកើនឡើងនៃការក្ស័យធន ដោយវិស័យសេវាកម្មបានកត់ត្រាច្រើនបំផុតចំនួន ២.៩៤០ ករណី កើនឡើង ៤១,៧ ភាគរយ។ ឧស្សាហកម្មសំណង់ជាប់ចំណាត់ថ្នាក់លេខពីរដោយមាន ១.៦៩៣ កើនឡើង ៤១,៨ ភាគរយ។

បំណុលសរុបដែលបន្សល់ទុកដោយក្រុមហ៊ុនក្ស័យធនបានកើនឡើង ៣,១ ភាគរយដល់ ២,៤ ពាន់ពាន់លានយ៉េន ដែលដឹកនាំដោយក្រុមហ៊ុន Panasonic Liquid Crystal Display Co. ដែលបានដាក់ពាក្យសុំទូទាត់ក្នុងខែកញ្ញា ឆ្នាំ ២០២៣ ជាមួយនឹងបំណុលចំនួន ៥៨៣,៦ ពាន់លានយ៉េន៕