អ្នកទោស ដែលហែកគុករត់គេចខ្លួន ប៉ូលីសថៃ ស្នើឱ្យប្រជាជន មួយភូមិចាកចេញពីផ្ទះ ដើម្បីតាមចាប់វិញ
ថៃ៖ ប៉ូលីសអាចតាមប្រមាញ់អ្នកទោស ដែលរត់គេចខ្លួននោះឈ្មោះ Chaowalit Thongduang ដែលបានរត់គេចខ្លួនបន្ទាប់ពីការបាញ់ប្រហារជាមួយប៉ូលីស កាលពីថ្ងៃពុធនៅក្នុងស្រុក Palian ខេត្ត Trang ប្រទេសថៃ ខណៈអ្នកស្រុក នៅក្នុងភូមិតំបន់ភ្នំមួយត្រូវបានស្នើសុំឱ្យចាកចេញជាបណ្ដោះអាសន្នសិន ។
ការតាមប្រមាញ់ចាប់អ្នកទោសឈ្មោះ Chaowalit ហៅ Sia Pang Nanod នៅជួរភ្នំ Banthad កាន់តែមានសន្ទុះខ្លាំងឡើង ដោយមានអាជ្ញាធរនៅក្នុងស្រុកចំនួនពីរគឺ Manang និង Thungwa ទាំងក្នុងខេត្ត Satun ដែលនៅជិតខាងបង្កើតប៉ុស្តិ៍ត្រួតពិនិត្យដើម្បីត្រួតពិនិត្យប្រជាពលរដ្ឋគ្រប់ទិសទី នេះយោងតាមសារព័ត៌មាន Bangkok Post ចេញផ្សាយនៅថ្ងៃទី១២ ខែវិច្ឆិកា ឆ្នាំ២០២៣ បានឱ្យដឹង ។
គេជឿថាអ្នកទោស និងអង្គរក្សប្រដាប់អាវុធបានរត់ឆ្ពោះទៅភាគខាងកើតនៃជួរភ្នំ ។ ប៉ូលិស និងមន្ត្រីល្បាតព្រៃត្រូវបានកេណ្ឌដើម្បីស្វែងរក ។
មន្ត្រីនាយកដ្ឋានបង្ក្រាបបទល្មើស និងមន្ត្រីល្បាតព្រៃកំពុងចុះត្រួតពិនិត្យតំបន់ដែនជម្រកសត្វព្រៃ Banthad ក្នុងខេត្ត Satun ខណៈមន្ត្រីរាប់សិបនាក់ មកពីស្នងការដ្ឋាននគរបាលខេត្តតំបន់៩ និងនគរបាលមូលដ្ឋានខេត្ត Trang កំពុងប្រតិបត្តិការក្នុងតំបន់ភ្នំដោយប្រើម៉ូតូ ។
លោក ស៊ូ ថុន ប្រជាពលរដ្ឋ នៅភូមិបត់ត្រា បាននិយាយថា ប៉ូលិសបានស្នើឲ្យអ្នកស្រុកចាកចេញពីតំបន់នោះរយៈពេលពីរថ្ងៃ ហើយក្រុមគ្រួសាររបស់គាត់បានគោរពតាម ដើម្បីសុវត្ថិភាពរបស់ខ្លួន។ គាត់មិនហ៊ានទៅធ្វើការនៅចម្ការកៅស៊ូទេ ទាល់តែចាប់បានអ្នករត់គេចខ្លួន ៕