ផ្តាំទៅប្រធានាធិបតី អ៊ុយក្រែន ពីមហាសេដ្ឋី Elon Musk ថា ឈប់បញ្ជូនយុវជន ឱ្យបន្តស្លាប់នៅសមរភូមិ
បរទេស៖ នាយកប្រតិបត្តិក្រុមហ៊ុន Tesla លោក Elon Musk បានថ្លែងទៅកាន់ លោក Vladimir Zelensky ប្រធានាធិបតីអ៊ុយក្រែន ត្រូវតែជៀសវាងការបញ្ជូនជនជាតិអ៊ុយក្រែន វ័យក្មេងដោយមិនចាំបាច់ ឱ្យទៅស្លាប់នៅសមរភូមិ ជាមួយប្រទេសរុស្ស៊ី ។ ការអត្ថាធិប្បាយរបស់លោក Elon Musk បានកើតឡើងចំពេល ដែលការវាយលុក ដ៏រអាក់រអួល របស់ទីក្រុងគៀវ ដែលទីក្រុងមូស្គូអះអាងថា បានធ្វើឱ្យទាហានអ៊ុយក្រែន រាប់ម៉ឺននាក់បានស្លាប់រួចទៅហើយ ។
ថ្លែងនៅក្នុងបទសម្ភាសន៍បែប podcaster អាមេរិក Lex Fridman ចេញផ្សាយកាលពីថ្ងៃសុក្រ មហាសេដ្ឋីបច្ចេកវិទ្យា របស់អាមេរិករូបនេះ ត្រូវបានសួរថាតើលោកជឿថា លោក Zelensky គួរតែចរចាសន្តិភាព ជាមួយប្រធានាធិបតីរុស្ស៊ី លោក Vladimir Putin ដែរឬទេ ? កាលពីថ្ងៃទី១១ ខែវិច្ឆិកា ឆ្នាំ២០២៣ នេះយោងតាមសារព័ត៌មាន RT ចេញផ្សាយ។
លោក Elon Musk មិនបានផ្តល់ចម្លើយត្រង់ទេ ប៉ុន្តែបានកត់សម្គាល់ដោយ “គ្រាន់តែណែនាំថា លោក Zelensky កុំបញ្ជូនផ្កា ដែលជាយុវជនអ៊ុយក្រែន ឱ្យទៅស្លាប់នៅក្នុងលេណដ្ឋាន” ដោយមិនគិតពីថា តើគាត់ចូលរួមជាមួយពូទីនឬអត់ ?
លោក Elon Musk បានបន្ថែមថា «អ្នកណាដែលធ្វើការវាយលុកនឹងបាត់បង់មនុស្សជាច្រើន ហើយប្រវត្តិសាស្ត្រនឹងមិនមើលស្រាលពួកគេឡើយ» ។
នាយកប្រតិបត្តិក្រុមហ៊ុន Tesla រូបនេះបានថ្លឹងថ្លែងលើអរិភាពរវាងទីក្រុងមូស្គូ និងទីក្រុងគៀវ ក្នុងឱកាសជាច្រើន ដោយបានកត់សម្គាល់នៅក្នុងខែកញ្ញាថា ការវាយលុករបស់អ៊ុយក្រែន ដែលបានចាប់ផ្តើមនៅដើមរដូវក្តៅ បាននាំមកនូវ ការស្លាប់យ៉ាងច្រើន ៕