តំបន់ហ្កាហ្សា កំពុងក្លាយជាទីបញ្ចុះសពកុមារ ប្រមុខUN ទាមទារឲ្យមានបទឈប់បាញ់
UN៖ លោក Antonio Guterres អគ្គលេខាធិការអង្គការសហប្រជាជាតិ បាននិយាយកាលពីថ្ងៃចន្ទ ទី៦ ខែវិច្ឆិកាថា តំបន់ហ្កាហ្សាកំពុងក្លាយជាទីបញ្ចុះសពសម្រាប់កុមារ ដោយបានទាមទារកាន់តែខ្លាំងឱ្យមានបទឈប់បាញ់នៅក្នុងតំបន់រងការឡោមព័ទ្ធមួយនេះ ជាទីដែលក្រុមអាជ្ញាធរសុខាភិបាល ប៉ាឡេស្ទីនបាននិយាយថា ចំនួនអ្នកស្លាប់ដោយសារការវាយប្រហាររបស់អ៊ីស្រាអែលមានជាង ១០.០០០នាក់។
ទាំងអ៊ីស្រាអែល ទាំងក្រុមសកម្មប្រយុទ្ធហាម៉ាស ដែលគ្រប់គ្រងតំបន់ហ្កាហ្សានេះ សុទ្ធតែបានច្រានចោលសម្ពាធពីអន្តរជាតិដែលកំពុងកើនឡើងសម្រាប់បទឈប់បាញ់ ។ អ៊ីស្រាអែល និយាយថា ចំណាប់ថ្នូរ ដែលក្រុមហាម៉ាសបានចាប់ខ្លួន អំឡុងការវាយឆ្មក់ នៅភាគខាងត្បូងអ៊ីស្រាអែល នៅថ្ងៃទី ៧ ខែតុលា គួរតែត្រូវបានដោះលែងជាមុនសិន ។
ចំនែកក្រុមហាម៉ាស និយាយថា ខ្លួននឹងមិនដោះលែងពួកគេ ឬបញ្ឈប់ការប្រយុទ្ធគ្នាឡើយ ខណៈតំបន់ហ្កាហ្សាកំពុងស្ថិតនៅក្រោមការវាយលុកខ្លាំងពីកងទ័ពអ៊ីស្រាអែល ។
ក្នុងនោះផងដែរ លោក Guterres បានប្រាប់ក្រុមអ្នកយកព័ត៌មានថា ប្រតិបត្តិការថ្មើរជើងដោយកងកម្លាំងការពារអ៊ីស្រាអែល និងការទម្លាក់គ្រាប់បែកជាបន្តបន្ទាប់កំពុងវាយប្រហារជនស៊ីវិល មន្ទីរពេទ្យ ជំរំជនភៀសខ្លួន វិហារអ៊ីស្លាម ព្រះវិហារផ្សេងៗ និងទីស្នាក់ការរបស់អង្គការសហប្រជាជាតិ រួមទាំងទីជម្រក ។
ប្រមុខអង្គការសហប្រជាជាតិរូបនេះ បានបន្ថែមថា ក្នុងពេលជាមួយគ្នានេះ ក្រុមហាម៉ាស និងពួកសកម្មប្រយុទ្ធផ្សេងទៀត ប្រើប្រាស់ជនស៊ីវិលជាខែល និងបន្តបាញ់រ៉ូកែតដោយមិនរើសមុខឆ្ពោះទៅរកអ៊ីស្រាអែល ដោយលោកបានអំពាវនាវឱ្យមានការដោះលែងចំណាប់ថ្នូរទាំងអស់ជាបន្ទាន់ និងដោយគ្មានលក្ខខណ្ឌ ៕