ករណីវ៉ៃព្រៃភ្នំរុករករ៉ែ នៅខេត្តពោធិ៍សាត់ រដ្ឋមន្ត្រីក្រសួងបរិស្ថាន ដឹកនាំបង្ក្រាប គ្រឿងចក្រ និងឃាត់ខ្លួនមនុស្ស០៧នាក់

ពោធិ៍សាត់ ៖ ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន ដឹកនាំសមត្ថកិច្ចអាជ្ញាធរខេត្ត មានលោក សាយ សុជាតិ អភិបាលរងខេត្តពោធិ៍សាត់ រួមជាមួយនឹងប្រធានមន្ទីរបរិស្ថានខេត្ត និងកងកម្លាំងអាវុធហត្ថខេត្តពោធិ៍សាត់ បានចុះបង្ក្រាបបទល្មើស គ្រឿងចក្រអាស្កាវ៉ាទ័រកាយ នឹងវ៉ៃព្រៃភ្នំរុករករ៉ែ នៅចំណុចភ្នំយាយម៉ៅ ភូមិបឹងត្នោត ឃុំតាលោ ស្រុកតាលោសែនជ័យ ខេត្តពោធិ៍សាត់ កាលពីព្រឹកថ្ងៃសៅរ៍ ទី២១ ខែតុលា ឆ្នាំ២០២៣ វេលាម៉ោង ០៩និង៤៥ នាទីព្រឹកកន្លងមកនេះ ។

បានឃាត់ខ្លួនជនសង្ស័យបានចំនួន ០៧នាក់ ក្នុងនោះមានមេការគ្រឿងចក្រ០១នាក់ផងដែរ និងបានបញ្ជូនទៅមន្ទីរបរិស្ថានខេត្តពោធិ៍សាត់ ដើម្បីកសាងសំណុំរឿង ចាត់ការតាមនិតិវិធីច្បាប់ ។

គួររំលឹកថា កាលពីថ្ងៃទី២៣ ខែកញ្ញា ឆ្នាំ២០២៣ មានក្រុមហ៊ុនមួយយកគ្រឿងចក្រអេស្កាវ៉ាទ័រឈូសឆាយ វ៉ៃព្រៃភ្នំយាយម៉ៅ ដែលជាសម្បត្តិរបស់រដ្ឋ ដោយសំអាងថា មានច្បាប់អនុញ្ញាតត្រឹមត្រូវ ពីរដ្ឋបាលខេត្តពោធិ៍សាត់។
ភ្នំ ដែលឈ្មួញកំពុងដាក់គ្រឿងចាក់វ៉ៃព្រៃ កាយដើម្បីរុករករ៉ែ នៅចំណុចភ្នំយាយម៉ៅ ភូមិបឹងត្នោត ឃុំតាលោ ស្រុកតាលោសែនជ័យ ប្រជាពលរដ្ឋក៏ធ្លាប់ឃើញកម្លាំងអង្គការ ហ្វាយអេត ចុះទៅទីនោះផងដែរ ប៉ុន្តែចំពោះអាជ្ញាធរមូលដ្ឋានដែលពាក់ព័ន្ធ បែរជាមិនដែលចុះទៅពិនិត្យនៅទីតាំងខាងលើនោះឡើយ បើតាមប្រភពប្រជាពលរដ្ឋបានឲ្យដឹង ។

ក្រោយមានការបង្ក្រាបសកម្មភាព វ៉ែ ព្រៃភ្នំ ជិះកាយរុករករ៉ែ ប្រជាពលរដ្ឋ ក្នុងឃុំតាលោ ស្រុកតាលោសែនជ័យ សម្ដែងការអបអរ និងសរសើរចំពោះការដឹកនាំ របស់លោក អ៊ាង សុផល្លែត រដ្ឋមន្ត្រីក្រសួងបរិស្ថាន ដឹកនាំបញ្ជាផ្ទាល់ ក្នុងការបង្ក្រាបក្រុមគ្រឿងចក្រខាងលើនេះ។ ពួកគាត់បន្តទៀតថា កន្លងមកក្រុមគ្រឿងចក្រវ៉ៃព្រៃកាយភ្នំនេះ បានបង្ករភាពអនាធិបតេយ្យធ្វើឲ្យមានការប៉ះពាល់ នៅទ្រុងទ្រាយធនធានភ្នំធម្មជាតិ ឥតស្ដាយស្រណោះ ហើយកន្លងមក ក៏មិនដែលឃើញ មានសមត្ថកិច្ចណាចុះបង្ក្រាប និងសួរនាំដែរ រហូតដល់ពេលនេះ ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន បានចុះបង្ក្រាបបញ្ជាផ្ទាល់។

សូមបញ្ជាក់ថា បើយោងតាម លិខិតរដ្ឋបាលសាលាខេត្តសេចក្តីសម្រេច ស្តីពី លក្ខខណ្ឌអាជ្ញាបណ្ណសិប្បកម្មធនធានរ៉ែ (សម្រាប់សេវាកម្មជីកយកអាចដី ដីក្រហម ខ្សាច់ ឬគ្រួស) អភិបាល នៃគណៈអភិបាលខេត្តពោធិ៍សាត់ ចុះថ្ងៃទី១៨ ខែកញ្ញា ឆ្នាំ២០២៣ គឺអនុញ្ញាតអោយ លោក កេង កុកឃៀង មានអាស័យដ្ឋាន នៅភូមិទួលគោក សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ តាមប្រការ១ លក្ខខណ្ឌអាជ្ញាបណ្ណសិប្បកម្មធនធានរ៉ែ (សម្រាប់សេវាកម្មជីកយកអាចដី ដីក្រហម ខ្សាច់ ឬគ្រួស) ប៉ុន្តែបុគ្គលនេះ បានយកលិខិត ជីកយករ៉ែមាស ហើយនៅថ្ងៃទី២៧ ខែកញ្ញា ឆ្នាំ២០២៣ នៅវេលាម៉ោង១០និង១៨នាទីព្រឹក ខាងអង្គការ វាយអេដ និងមន្ត្រីបរិស្ថាន កងរាជអាវុធហត្ថ បានចុះទៅហាមឃាត់ផងដែរ ប៉ុន្តែពួកគេនៅធ្វើសកម្មភាព ទើប ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន ដឹកនាំបង្ក្រាបផ្ទាល់កាលពីម្សិលមិញ ៕