សង្គ្រាមអ៊ីស្រាអែល លើហ្គាហ្សា អាមេរិកប្រើសិទ្ធិវ៉េតូ នៅក្រុមប្រឹក្សាសន្តិសុខអង្គការសហប្រជាជាតិ

UN៖ ក្រុមប្រឹក្សាសន្តិសុខ អង្គការសហប្រជាជាតិ កាលពីថ្ងៃពុធ ដែលបានអំពាវនាវឲ្យផ្អាកប្រយុទ្ធ ដើម្បីបុព្វហេតុមនុស្សធម៌នៅក្នុងជម្លោះរវាងអ៊ីស្រាអែល និងក្រុមសកម្មប្រយុទ្ធហាម៉ាស់ប៉ាឡេស្ទីន ដើម្បីអនុញ្ញាតឲ្យមានដំណើរការជំនួយមនុស្សធម៌ចូលទៅក្នុងតំបន់ហ្គាហ្សា តែសហរដ្ឋអាមេរិក ប្រើសិទ្ធិវ៉េតូ ចំពោះសេចក្តីសម្រេចនេះ។

ការបោះឆ្នោតលើឯកសារ ដែលបានពង្រាងដោយប្រទេសប្រេស៊ីល ត្រូវបានពន្យាពេល២ដង កាលពីរថ្ងៃមុន ខណៈសហរដ្ឋអាមេរិក ព្យាយាមសម្របសម្រួលដំណើរការផ្តល់ជំនួយទៅដល់តំបន់ហ្គាហ្សា ។ សមាជិកចំនួន១២រូប បានបោះឆ្នោតគាំទ្រឯកសារពង្រាងកាលពីថ្ងៃពុធ ខណៈរុស្ស៊ី និងចក្រភពអង់គ្លេស អនុប្បវាទ ។

លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ បានប្រាប់ក្រុមប្រឹក្សាដែលមានសមាជិក១៥រូប បន្ទាប់ពីការបោះឆ្នោតថា យើងស្ថិតលើមូលដ្ឋាន ដែលកំពុងធ្វើការផ្នែកការទូតយ៉ាងប្រឹងប្រែង។ យើងជឿថា យើងចាំបាច់ត្រូវ អនុញ្ញាឲ្យបញ្ហានេះធ្វើការតាមរយៈការទូត ។ ពិតណាស់ សេចក្តីសម្រេចគឺមានសារៈសំខាន់ ហើយក្រុមប្រឹក្សានេះត្រូវតែនិយាយដោយស្មោះត្រង់ ប៉ុន្តែចំណាត់ការទាំងអស់ដែលយើងធ្វើ ត្រូវបានជម្រាបប្រាប់ពីការពិត លើមូលដ្ឋាន និងការគាំទ្រកិច្ចប្រឹងប្រែងផ្នែកការទូតដោយផ្ទាល់។ ការគាំទ្រនេះ អាចជួយសង្គ្រោះជីវិត ។

ជាការពិត ទីក្រុងវ៉ាស៊ីនតោន ការពារសម្ព័ន្ធមិត្ត អ៊ីស្រាអែលរបស់ខ្លួន ពីសកម្មភាពណាមួយរបស់ក្រុមប្រឹក្សាសន្តិសុខ ។ លោក Antonio Guterres អគ្គលេខាធិការអង្គការសហប្រជាជាតិ កាលពីថ្ងៃពុធ បានអំពាវនាវឲ្យមានបទឈប់បាញ់មនុស្សធម៌បន្ទាន់ដើម្បីអនុញ្ញាតឲ្យមានការដោះលែងចំណាប់ថ្នូរ និងដំណើរការជំនួយមនុស្សធម៌ ទៅកាន់តំបន់ហ្គាហ្សា។

ចំនែករុស្ស៊ី បាននិយាយថា ខ្លួនបានស្នើសុំឲ្យមហាសន្និបាតអង្គការសហប្រជាជាតិ ដែលមានសមាជិក១៩៣ប្រទេស ត្រូវបានកោះហៅសម្រាប់កិច្ចប្រជុំពិសេសបន្ទាន់ស្តីពីជម្លោះនេះ ។