វិបត្តិប្រធានសភាសាធារណរដ្ឋរបស់អាមេរិក កាន់តែបន្ថែមភាពបន្ទាន់កាន់តែខ្លាំង បន្ទាប់ពីសង្គ្រាមនៅអ៊ីស្រាអែល

អាមេរិក៖ នៅក្នុងសភាតំណាងរាស្រ្តអាមេរិក សមាជិកគណបក្សសាធារណរដ្ឋ ប្រឈមមុខនឹងសម្ពាធថ្មីក្នុងការជ្រើសរើសប្រធានសភា បន្ទាប់ពីអ៊ីស្រាអែលបានប្រកាសសង្រ្គាម កាលពីថ្ងៃអាទិត្យ បន្ទាប់ពីការវាយប្រហារដ៏កម្រមួយដោយក្រុមសកម្មប្រយុទ្ធហាម៉ាស់ ដែលបានជំរុញឱ្យមានការអំពាវនាវជាជំនួយយោធាបន្ថែមទៀត របស់សហរដ្ឋអាមេរិក។

អ្នកតំណាងលោក Jim Jordan រួមទាំង សមាជិកគណបក្សសាធារណរដ្ឋមួយចំនួន ដែលជាបេក្ខជនលេចធ្លោសម្រាប់តំណែងប្រធានសភានេះ ក៏ចង់ឱ្យសមាជិកសភាយល់ព្រមលើវិធីឆ្ពោះទៅមុខ លើបញ្ហាដ៏អាក្រក់បំផុតដែលសភាកំពុងប្រឈមមុខ គឺការចំណាយសហព័ន្ធសម្រាប់ឆ្នាំបច្ចុប្បន្ន នៅពេលពួកគេជ្រើសរើសប្រធានសភាថ្មី។

សមាជិកសភាមកពីគណបក្សសាធារណរដ្ឋ ត្រូវបានគេព្យាករណ៍ថា នឹងចូលរួមស្ដាប់ការជជែកដេញដោលពីបណ្ដាបេក្ខជនប្រធានសភា ក្នុងការជជែកបិទទ្វារនៅថ្ងៃអង្គារ ទី១០ ខែតុលា ខាងមុខនេះ ហើយនឹងបោះឆ្នោតជ្រើសរើសអ្នកទទួលការតែងតាំងថ្មីរបស់ពួកគេនៅថ្ងៃពុធ ទី១១ ខែតុលា។ ការបោះឆ្នោតជាន់ខ្ពស់ក្នុងសភា ដើម្បីជ្រើសរើសអ្នកជំនួសតំណែងអតីតប្រធានសភាបក្សសាធារណរដ្ឋ លោក Kevin McCarthy អាចនឹងមកដល់នៅចុងសប្តាហ៍នេះ។

ក្រុមអ្នកនយោបាយប្រកាន់ជំហរតឹង ដែលជំរុញឱ្យមានការកាត់បន្ថយ ដោយអាចនឹងបន្ថយការផ្តល់មូលនិធិរបស់រដ្ឋាភិបាល ដល់កម្រិតសារពើពន្ធឆ្នាំ២០២២ បានមានការខ្វែងគំនិតគ្នាក្នុងចំណោមសមាជិកសភាមកពីគណបក្សសាធារណរដ្ឋ អស់រយៈពេលជាច្រើនខែ ហើយបានធ្វើឲ្យសភាឈានជិតទៅដល់ការបិទរដ្ឋាភិបាល កាលពីជាងមួយសប្តាហ៍មុន។

សេចក្តីព្រាងច្បាប់ណាមួយរបស់សភា ដែលរួមបញ្ចូលការកាត់បន្ថយការចំណាយធ្ងន់ធ្ងរ ទំនងជាមិនអាចឆ្លងផុតព្រឹទ្ធសភា ដែលគ្រប់គ្រងដោយគណបក្សប្រជាធិបតេយ្យ របស់សហរដ្ឋអាមេរិកនោះទេ៕