អបអរការដាក់ដំណើរការព្រលានយន្តហោះអន្តរជាតិសៀមរាប-អង្គរ មនុស្សជាង ៧០០នាក់ បានចូលរួមរត់ប្រណាំង
សៀមរាប៖ ឪកាសអបអរខួប១០ឆ្នាំ នៃការបង្កើតយុទ្ធសាស្ត្រ “ផ្លូវមួយ ខ្សែក្រវ៉ាត់មួយ” និងដើម្បីអបអរដាក់ឱ្យដំណើរការជើងហោះហើរអាកាសយានដ្ឋានអន្តរជាតិសៀមរាប-អង្គរ មានប្រជាជនកម្ពុជា-ចិន ជាង ៧០០នាក់ បាននាំគ្នារត់ប្រណាំងចម្ងាយខ្លី ដែលនឹងប្រព្រឹត្តទៅ នៅថ្ងៃទី១៦ ខែតុលា ឆ្នាំ២០២៣ខាងមុខនេះ នៅបណ្ដោយផ្លូវតភ្ជាប់អាកាសយានដ្ឋានអន្តរជាតិសៀមរាប-អង្គរ កាលពីថ្ងៃទី៨ ខែតុលា ឆ្នាំ២០២៣។
ប្រធានសមាគមទេសចរណ៍កម្ពុជា លោកជំទាវ ឆាយ ស៊ីវលីន មានប្រសាសន៍ថា ការរត់ម៉ាតុងនេះ ក៏បានបង្ហាញទៅភ្ញៀវទេសចរនៅក្នុងពិភពលោកថា កម្ពុជាកំពុងទទួលភ្ញៀវទេសចរគ្រប់ជាតិសាសន៍។ ហើយក៏ជាការឆ្លើយតបថា កម្ពុជាជាគោលដៅទេសចរណ៍ដែលមានសុវត្ថភាព និងអាចបង្កើតព្រឹត្តិការណ៍បានគ្រប់ទីកន្លែង។
លោកអភិបាលរងខេត្តសៀមរាប ពិន ប្រាកដ បានមានប្រសាសន៍ថា ពិធីរត់ប្រណាំងចម្ងាយខ្លី នៅលើផ្លូវហាយវេអាកាសយានដ្ឋានអន្តរជាតិសៀមរាបអង្គរ នៅទឹកដីខេត្តសៀមរាបនេះ ត្រូវបានរៀបចំឡើង ក្នុងគោលបំណងអបអរសាទរចំពោះខួបលើកទី១០ នៃការបង្កើតយុទ្ធសាស្ត្រ “ផ្លូវមួយ ខ្សែក្រវ៉ាត់មួយ” និងចូលរួមអបអរសាទរអាកាសយានដ្ឋានអន្តរជាតិសៀមរាបអង្គរ ដែលគ្រោងនឹងបើកដំណើរការ និងដាក់ឱ្យប្រើប្រាស់ ជាផ្លូវការនាពេលខាងមុខឆាប់ៗនេះ ក៏ដូចជារួមចំណែកជំរុញ និងទាក់ទាញស្តាវិស័យទេសចរណ៍នៅប្រទេស កម្ពុជាក៏ដូចជានៅខេត្តសៀមរាបឱ្យកាន់តែល្អប្រសើរ ក្រោយវិបត្តិសេដ្ឋកិច្ចនៃការរីករាលដាលជំងឺកូវីដ-១៩។
ព្រឹត្តិការណ៍រត់ប្រណាំងចម្ងាយខ្លីនាពេលនេះ គឺជាការចូលរួមចំណែក ជំរុញឱ្យមានការរីកចម្រើននូវ វិស័យកីឡា ក៏ដូចជាវិស័យទេសចរណ៍ទូទាំងខេត្ត។ សូមបញ្ជាក់ថា កម្មវិធីរត់ប្រណាំង ដើម្បីអបអរការដាក់ដំណើរការព្រលានយន្តហោះអន្តរជាតិសៀមរាប-អង្គរ គឺមាន ៣វិញ្ញាសារួមមានរត់ ៥គីឡូម៉ែត្រ ១០គីឡូម៉ែត្រ ១៥គីឡូម៉ែត្រ ដែលមានអ្នកចូលរួមជាង ៧០០នាក់៕