មន្ទីរពេទ្យគន្ធបុប្ផា កុមារជាង ៩ ម៉ឺននាក់ក្នុងខែកញ្ញា បានពិនិត្យព្យាបាល
ភ្នំពេញៈ មន្ទីរពេទ្យគន្ធបុប្ផា បានពិនិត្យព្យាបាលកុមារឈឺចំនួន ៩៣ ៩៥៤នាក់ ក្នុងខែកញ្ញានេះ ឃើញថាចំនួននេះ មានការកើនឡើង ៨ ១៤៨ នាក់ បើធៀបនឹងខែសីហា ដែលមានចំនួន ៨៥ ៨០៦នាក់ ។ នេះបើតាមរបាយការណ៍ស្តីពីតួលេខពិតក្នុងខែកញ្ញា ឆ្នាំ២០២៣។
ក្នុងខែកញ្ញា ឆ្នាំ២០២៣នេះ មានកុមាឈឺ ចំនួន ៩៣ ៩៥៤ នាក់ ត្រូវបានពិនិត្យព្យាបាល នៅក្នុងផ្នែកពិគ្រោះជំងឺក្រៅ ដែលចំនួននេះ មានការកើនឡើង ៨ ១៤៨ នាក់ បើធៀបនឹងខែមុន ដែលមានចំនួន ៨៥ ៨០៦ នាក់។ កុមារមានជំងឺធ្ងន់ៗ ចំនួន ១៧ ៩១៥ នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យ មានការកើនឡើង ២៥០ នាក់ បើធៀបខែមុនដែលមាន ១៧ ៦៦៥ នាក់ តាមរបាយការណ៍របស់មន្ទីរពេទ្យគន្ធបុប្ផា ទទួលបានកាលពីថ្ងៃទី២ ខែតុលាបានឱ្យដឹង។
ចំពោះកុមារមានជំងឺគ្រុនឈាមមានចំនួន ២ ៧៤៥ នាក់ បានព្យាបាលនៅក្នុងមន្ទីរពេទ្យមានការថយចុះ ១៦៧នាក់ ធៀបនឹងខែសីហា ដែលមាន២ ៩១២នាក់។ ចំណែកកុមារចំនួន ២ ៥៤៥នាក់ ត្រូវបានទទួលការវះកាត់ ធៀបនឹងខែមុនដែលមានចំនួន ២ ២៩៥ នាក់មានការកើនឡើង ២៥០ នាក់។ កុមារ វះកាត់បេះដូង និងភ្ជិតប្រហោងបេះដូងតាមសរសៃឈាម នៅគន្ធបុប្ផា ភ្នំពេញ និងសៀមរាបមាន ចំនួន ៧០ នាក់ ធៀបនឹងខែមុនដែលមានចំនួន ៧៦នាក់ មានការថយចុះ ៦នាក់។
របាយការណ៍ដដែលបានឱ្យដឹងទៀតថា នៅផ្នែកសម្ភពនៃមន្ទីរពេទ្យជ័យវរ្ម័នទី៧ (គន្ធបុប្ផាទី៣) ស្ត្រីមានផ្ទៃពោះចំនួន ១០ ៦៥០ នាក់ បានមកពិនិត្យតាមដានផ្ទៃពោះ និងព្យាបាលនៅក្នុងផ្នែកពិគ្រោះជំងឺក្រៅនៃមន្ទីរសម្ភព កើនឡើង ៨០៤ នាក់ បើធៀបខែមុនដែលមានចំនួនអ្នកមកពិនិត្យចំនួន ៩ ៨៤៦។ ចំណែកការសម្រាលកូនបានចំនួន ១ ៩៥៨ នាក់ កើនឡើង ៩៣នាក់ បើធៀបខែមុនដែលមានចំនួន ១ ៨៦៥ នាក់។
តាមហ្វេសប៊ុក Dr. Beat Richner បានឱ្យដឹងថា ក្នុងខែកញ្ញា មានទារិកាតូចទើបអាយុបាន៣ខែ មកពីខេត្តស្វាយរៀង កើតមិនគ្រប់ខែ និងមានជំងឺបេះដូងស្មុគស្មាញពីកំណើត ដោយមានសរសៃឈាមបេះដូងស្តាំត្បៀតតូចខាងស្តាំ និងសរសៃឈាមសួតឆ្វេងដុះបែកចេញពីសរសៃបេះដូងឆ្វេង និងមានសរសៃកងអាទែរធំនៃបេះដូងឆ្វេងរុំរឹតបំពង់ខ្យល់ និងបំពង់បាយ នាំឱ្យពិបាកដកដង្ហើម ព្រមទាំងមានសន្ទះបេះដូងចំហទៀតផង។ នាងត្រូវបានក្រុមគ្រូពេទ្យ នៅមន្ទីរពេទ្យគន្ធបុប្ផាភ្នំពេញ ជួយសង្គ្រោះដោយវះកាត់ភ្ជិតប្រហោងបេះដូង និងកាត់តតម្រូវសរសៃបេះដូងឡើងវិញបានដោយជោគជ័យជាករណីដ៏កម្របំផុតដែលកូនង៉ែតនេះមានជំងឺបេះដូង និងសរសៃឈាមបេះដូងដល់ទៅ៣មុខ។
ទន្ទឹមនេះ មន្ទីរពេទ្យគន្ធបុប្ផាបានថ្លែងអំណរគុណដល់សប្បុរសជនទាំងអស់ដែលបានបរិច្ចាគថវិកាជាបន្តបន្ទាប់ទាំងប្រចាំខែ និងប្រចាំឆ្នាំ ជូនដល់មូលនិធិគន្ធបុប្ផាកម្ពុជា សម្រាប់ដំណើរការពិនិត្យព្យបាលជំងឺដោយឥតគិតថ្លៃ សំដៅជួយសម្រាលទុក្ខលំបាកជូនប្រជាពលរដ្ឋកម្ពុជា។
មន្ទីរពេទ្យគន្ធបុប្ផាបញ្ជាក់ថា៖«រាល់ការព្យាបាលទាំងអស់គឺឥតគិតថ្លៃ សម្រាប់គ្រប់ៗគ្នា ដោយគ្មានការរើសអើង អរគុណមូលនិធិគន្ធបុប្ផាស្វ៊ីស និងមូលនិធិគន្ធបុប្ផាកម្ពុជា អរគុណចំពោះសប្បុរសជនគ្រប់ៗរូបដែលតែងតែគាំទ្រដល់ដំណើរការមន្ទីរពេទ្យគន្ធបុប្ផា»។
ប្រធានផ្នែកទំនាក់ទំនងសាធារណ:នៃមូលនិធិគន្ធបុប្ផាកម្ពុជា លោក ឃាន តួក បានឱ្យដឹងថា ដើម្បីផ្សព្វផ្សាយអំពាវនាវ និងបំផុសចលនាកៀរគរការបរិច្ចាគពីមន្ត្រីរាជការក្នុងការគាំទ្រដល់កិច្ចដំណើរការរបស់មន្ទីរពេទ្យគន្ធបុប្ផា គណៈកម្មការទ្រទ្រង់មូលនិធិគន្ធបុប្ផាកម្ពុជា ត្រូវបានបង្កើតឡើងទាំងនៅថ្នាក់ជាតិក៏ដូចជានៅថ្នាក់ក្រោមជាតិ ដែលគិតមកទល់ពេលនេះ មានការបង្កើតប្រមាណជាង៦០ គណៈកម្មការហើយ។
លោកបានបន្តថា បច្ចុប្បន្ន មន្ទីរពេទ្យមានមូលនិធិ២សំខាន់ៗ គឺមូលនិធិគន្ធបុប្ផាស្វ៊ីស ដែលនៅតែរក្សាការបរិច្ចាគដដែល រហូតដល់៣ឆ្នាំទៀត។ ទន្ទឹមនឹងនោះមូលនិធិគន្ធបុប្ផាកម្ពុជា បានចូលរួមចំណែកកាន់តែច្រើនឡើងៗផ្នែកហិរញ្ញវត្ថុដើម្បីគាំទ្រកិច្ចដំណើរការមន្ទីរពេទ្យគន្ធបុប្ផាទាំងនៅភ្នំពេញ និងសៀមរាប ដែលត្រូវការចំណាយប្រមាណ៤០លានដុល្លារក្នុង១ឆ្នាំ ដោយមូលនិធិទាំង២នៅតែផ្គត់ផ្គង់បានគ្រប់គ្រាន់៕