ភាពមិនប្រាកដប្រជានៃសេដ្ឋកិច្ច សាជីវកម្មរបស់អាមេរិកក្ស័យធន កើនឡើងដល់កម្រិតខ្ពស់បំផុត

សហរដ្ឋអាមេរិក៖ នៅសប្តាហ៍នេះ ក្រុមហ៊ុនវិនិយោគ Guggenheim បាននិយាយថា ការក្ស័យធន​សាជីវកម្ម​ នៅ​ក្នុង​សហរដ្ឋ​អាមេរិក ហាក់ដូចជាកើនឡើងដល់កម្រិតខ្ពស់បំផុតក្នុងរយៈពេល១៣ឆ្នាំ ដោយសារ​ការ​ដំឡើង​អត្រា​ការប្រាក់របស់ធនាគារកណ្តាលរបស់សហរដ្ឋអាមេរិក (Fed) និងភាពមិនប្រាក​ដ​ប្រជា​នៃ​សេដ្ឋកិច្ច កំពុងធ្វើឱ្យប៉ះពាល់ដល់សេដ្ឋកិច្ចរបស់ប្រទេសមួយនេះ នេះបើយោង​តាម​គេហទំព័រ​តាម​ដាន​ទីផ្សារ MarketWatch ។

សាជីវកម្មជាង ៤៥០ទីតាំង បានស្វែងរកទីជំរកនៅក្នុងតុលាការក្ស័យធន គិតត្រឹមដំណាច់​ខែ​សីហា​ឆ្នាំនេះ ដែលលើសពីចំនួនសរុបប្រចាំឆ្នាំសម្រាប់រយៈពេលពីរឆ្នាំកន្លងមកនេះ។ ដោយ​សារ​អតិផរណានៅតែខ្ពស់ ហើយអត្រាការប្រាក់កំពុងកើនឡើង ធ្វើឲ្យការទូ​ទាត់​នៃ​ការ​ខ្ចី​ប្រាក់​កាន់​តែថ្លៃឡើង សម្រាប់សាជីវកម្មអាមេរិក។ របាយការណ៍បាននិយាយថា អ្នកដែលបរាជ័យ​ក្នុង​ការ​បំពេញកាតព្វកិច្ចបំណុលរបស់ពួកគេនឹងប្រឈមមុខនឹងការក្ស័យធន។

ធនាគារកណ្តាល Fed កាលពីថ្ងៃពុធ​សប្តាហ៍មុន បានផ្អាកលើការដំឡើងអត្រាការប្រាក់ និងរក្សា​អត្រា​មូល​និធិសហព័ន្ធដែលនៅសេសសល់ ចន្លោះពី៥,២៥ភាគរយ ទៅ៥,៥០ភាគរយ។ ប៉ុន្តែ​ក្រុម​អ្នក​វិភាគបានព្រមានថា ការដំឡើងអត្រាការប្រាក់នេះ នឹងបន្ត​ឡើង​វិញ​ ដើម្បី​ធ្វើ​ឱ្យអ​តិផរណា​ធ្លាក់ចុះ។

កាលពីខែមុន ក្រុមហ៊ុនវិនិយោគ Goldman Sachs បានព្រមានថា «ប័ណ្ណបំណុលសាជីវកម្ម ដែល​កំពុង​លេចចេញជាជាង ២សែនកោដិ៍លានដុល្លារ» នឹងអង្រួន​សេដ្ឋកិច្ច​សហរដ្ឋ​អាមេរិក​ក្នុង​រយៈពេល​ ២ឆ្នាំខាងមុខ ហើយនាំ​ទៅ​ដល់​ការ​បញ្ឈប់​ការងារ​ជា​ថ្មី​សម្រាប់​បុគ្គលិក​អាមេរិក​ផង​ដែរ​៕​