តោះរៀនធ្វើ នំពុម្ពខ្មែរយើង!

ក្មេងៗធ្លាប់ឆ្លងកាត់ជំនាន់ឆ្នាំ៩០ជាង បានស្គាល់ច្បាស់ពីនំពុម្ភ ព្រោះឲ្យតែដើរទៅរៀនតាមផ្លូវត្រូវឈប់ទិញញុំសឹងតែរាល់ព្រឹកតែម្តង ដោយហេតុថាតម្លៃធូរថ្លៃ ហើយញុំឆាប់ឆ្អែត ជូនកាលវិញទិញ១នំ ចែកគ្នាញុំ២នាក់ក៏មានដែរ។ ដូច្នឹង ថ្ងៃនេះ ចង់រំលឹកអតីតកាលពីក្មេងៗ សាកល្បងរៀនធ្វើញុំខ្លួនឯង តោះបងប្អូនចង់ធ្វើញុំ?

គ្រឿងផ្សំ៖

– ម្សៅអង្ករ ៣៥០ក្រាម

– ម្សៅមី ៣ស្លាបព្រាបាយ

– ស៊ុត ២គ្រាប់

– ខ្ទិះដូង ១ចានចង្កឹះ

– ស្ករស កន្លះចានចង្កឹះ

– សាច់ដូងកោស កន្លះចានចង្កឹះ

– អំបិល កន្លះស្លាបព្រាកាហ្វេ

– ប្រេងឆា

វិធីធ្វើ

១-មុនដំបូងយកម្សៅអង្ករមកលាយជាមួយ អំបិល និងម្សៅមី រួចច្របល់ចូលគ្នាឲ្យសព្វទុកមួយឡែកសិន។

២-យកចានធំមួយគោះស៊ុតដាក់ចូលវាយវាឲ្យបែកសិន បន្ទាប់មកដាក់ស្ករស រួចកូរចូលគ្នា។

៣-យកខ្ទិះដូងដាក់ចូលកូរចូលគ្នាឲ្យរលាយសព្វ ទើបយកម្សៅអង្ករដែលលាយទុកចាក់ចូល ជាមួយនិងសាច់ដូង។

៤-កូរចូលគ្នាឲ្យរលាយបានសព្វល្អ រួចហើយទុកវាប្រហែលជា ១០នាទីសិន។

៥-១០នាទីក្រោយមក យកពុម្ពមកដាក់លើភ្លើងរួចលាបប្រេងឆាទាំងសងខាងទុកឲ្យក្តៅសិន ទើបយកម្សៅចាក់ចូលក្នុងពុម្ពទុកឲ្យឆ្អិនទាំងសងខាងជាការស្រេច៕