ការសន្យាបន្តសហការគ្នា រវាងកម្ពុជា-អាស៊ែបៃហ្សាន លើការបណ្តុះបណ្តាលធនធានមនុស្ស និងជំរុញពាណិជ្ជកម្ម
ភ្នំពេញ៖ តាមរយៈរដ្ឋសភាកម្ពុជា និងឯកអគ្គរដ្ឋទូតនៃសាធារណរដ្ឋអាស៊ែបៃហ្សាន ដែលទើបតែងតាំងថ្មីប្រចាំកម្ពុជា ក្នុងនោះកម្ពុជា-អាស៊ែបៃហ្សាន បានសន្យាបន្តសហការគ្នាលើការបណ្តុះបណ្តាលធនធានមនុស្ស និងខិតខំជំរុញលើកកម្ពស់ទំនាក់ទំនងពាណិជ្ជកម្ម ទេសចរណ៍ឱ្យមានការរីកចម្រើន ដើម្បីផលប្រយោជន៍ប្រទេសទាំងពីរ។
ក្នុងជំនួបសម្តែងការគួរសម និងពិភាក្សាការងារ បានបង្ហាញជំហរ ធ្វើឡើងរវាងប្រធានរដ្ឋសភា សម្តេចរដ្ឋសភាធិបតី ឃួន សុដារី និងលោក ស៊ូវគី មេឌីហ្សាដា (Shovgi Mechdizade) ឯកអគ្គរដ្ឋទូតនៃសាធារណរដ្ឋអាស៊ែបៃហ្សាន ដែលទើបតែងតាំងថ្មីប្រចាំកម្ពុជា ដែលមាននិវេសនដ្ឋាននៅទីក្រុងហាណូយ ប្រទេសវៀតណាម នៅទី១៥ ខែកញ្ញា ឆ្នាំ២០២៣។
សេចក្តីជូនដំណឹងស្តីពីលទ្ធផលជំនួបនោះបានឱ្យដឹងថា សម្តេចរដ្ឋសភាធិបតី ឃួន សុដារី បានថ្លែងថា រដ្ឋសភាកម្ពុជា ត្រៀមខ្លួនជាស្រេច ដើម្បីផ្តល់ការគាំទ្រ និងកិច្ចសហការពេញលេញជាមួយលោក ស៊ូវគី មេឌីហ្សាដា ដើម្បីជួយឱ្យបេសកកម្មទទួលបានជោគជ័យ។
ជាមួយគ្នានេះ លោកស្រីសង្ឃឹមថា ក្រោមអាណត្តិការទូតរបស់លោក មេឌីហ្សាដា ទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា និងអាស៊ែបៃហ្សាន នឹងបន្តរីកលូតលាស់បន្ថែមទៀត។
ប្រភពខាងលើឱ្យដឹងថា៖«សម្តេចរដ្ឋសភាធិបតី ឃួន សុដារី បានស្នើរាជរដ្ឋាភិបាល ក៏ដូចជារដ្ឋសភា អាស៊ែបៃហ្សាន បន្តជួយបណ្តុះបណ្តាលធនធានមនុស្សដល់កម្ពុជា ទាំងខាងនីតិប្បញ្ញត្តិ និងនីតិប្រតិបត្តិ ពិសេសដើម្បីរដ្ឋសភាកម្ពុជា ធ្វើទំនើបកម្មស្ថាប័ន ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧នៃរដ្ឋសភា»។
លោកស្រីឱ្យដឹងទៀតថា អាស៊ែបៃហ្សាន ជាប្រទេសដែលបានជួយបណ្តុះបណ្តាលធនធានមនុស្សដល់កម្ពុជា ក្នុងសម័យសហភាពសូវៀត ហើយបញ្ញាវន្តខ្មែរដែលទទួលបានការបណ្តុះបណ្តាលពីអាស៊ែបៃហ្សាន បានក្លាយជាធនធានមនុស្សដ៏សំខាន់ក្នុងការអភិវឌ្ឍប្រទេសជាតិបច្ចុប្បន្ននេះ។
លោក ស៊ូវគី មេឌីហ្សាដា តាមរយៈរដ្ឋសភាកម្ពុជា បានអបអរសាទរចំពោះជោគជ័យធំធេង ដែលកម្ពុជាបានរៀបចំការបោះឆ្នោតសកលនាពេលថ្មីៗ និងបានអបអរសាទរចំពោះសម្តេចរដ្ឋសភាធិបតី ឃួន សុដារី ដែលត្រូវបានរដ្ឋសភាបោះឆ្នោតជ្រើសតាំងជាប្រធានរដ្ឋសភា នៅក្នុងនីតិកាលទី៧នេះ។
ប្រភពពីរដ្ឋសភាបញ្ជាក់ថា៖«ឯកឧត្តម ស៊ូវគី មេឌីហ្សាដា បានទទួលយកសំណើរបស់ សម្តេចរដ្ឋសភាធិបតី និងបានប្តេជ្ញាចិត្តថា នឹងខិតខំលើកកម្ពស់ទំនាក់ទំនងប្រទេសទាំងពីរឱ្យកាន់តែរឹងមាំឡើង ទាំងខាងស្ថាប័ននីតិប្បញ្ញត្តិ និងនីតិប្រតិបត្តិ»។
ជាមួយគ្នានេះលោក មេឌីហ្សាដា ក៏បានអរគុណរដ្ឋសភាកម្ពុជា ដែលបានគាំទ្រដល់សភាប្រទេសអាស៊ែបៃហ្សង់ បានក្លាយជាអ្នកសង្កេតការណ៍អន្តរសភាអាស៊ាន កាលពីឆ្នាំកន្លងទៅ នៅពេលសភាកម្ពុជាធ្វើជាម្ចាស់ផ្ទះនៃមហាសន្និបាត AIPA លើកទី៤៣នោះ។
ជាថ្មីម្តងទៀតលោកបានសន្យាថា នឹងខិតខំជំរុញលើកកម្ពស់ទំនាក់ទំនងពាណិជ្ជកម្ម ទេសចរណ៍ឱ្យមានការរីកចម្រើនឡើង ដើម្បីផលប្រយោជន៍ប្រទេសទាំងពីរ និងបានលើកឡើងនូវគំនិតផ្តួចផ្តើមការបង្កើតសមាគមអតីតនិស្សិតកម្ពុជានិងអាស៊ែបៃហ្សាន ដើម្បីពួកគេបានផ្សារភ្ជាប់ទំនាក់ទំនងជាមួយគ្នា និងបានសិក្សាពីភាសា ប្រវត្តិសាស្ត្រ វប្បធម៌ ពីគ្នាទៅវិញទៅមកផងដែរ៕