គោលនយោបាយ ដើម្បីគាំពារដល់ការអភិវឌ្ឍន៍សេដ្ឋកិច្ចក្រៅប្រព័ន្ធ ដាក់ចេញដោយរាជរដ្ឋាភិបាលអាណត្តិនេះ
ភ្នំពេញ៖ ការដាក់ចេញគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធ រាជរដ្ឋាភិបាលកម្ពុជានៅក្នុងអាណត្តិថ្មី នីតិកាលទី៧នេះ ជាគោលដៅលើកកម្ពស់លទ្ធភាពការធ្វើអាជីវកម្មគ្រប់ប្រភេទ ដើម្បីទទួលបានអត្ថប្រយោជន៍ ក៏ដូចជាការគាំពារនៃការទទួលបានហិរញ្ញប្បទានផ្សេងៗ។
រដ្ឋលេខាធិការក្រសួងកិច្ចការនារី លោកជំទាវ គង់ សូរីតា បានលើកឡើងក្នុងវេទិការសហគ្រិនស្រ្តី ក្នុងការអភិវឌ្ឍអាជីវកម្ម និងពិព័រណ៍ពាណិជ្ជកម្មក្នុងស្រុក នៅចុងសប្តាហ៍កន្លងមកថា ជុំវិញការអភវិឌ្ឍសេដ្ឋកិច្ចក្រៅ ថ្មីៗនេះកម្ពុជាបានបើកកិច្ចប្រជុំអន្តរក្រសួង ដើម្បីជជែកពិភាក្សាលើកិច្ចគាំពារ ក្នុងគោលដៅលើកកម្ពស់អ្នកធ្វើអាជីវកម្មក្រៅប្រព័ន្ធ។
រាជរដ្ឋាភិបាលនិងយកចិត្តទុកដាក់ ជាពិសេសស្រ្តីដែលប្រកបមុខរបរ ឬធ្វើការនៅក្រៅប្រព័ន្ធ មិនថាជាសហគ្រិន ជាម្ចាស់អាជីវកម្ម និងជានយោជិតក៏ដោយ ពួកគេនឹងទទួលបានអត្ថប្រយោជន៍ដូចៗគ្នា ដោយមិនមានត្រូវបោះបង់អ្នកណាម្នាក់។
លោកជំទាវ លើកឡើងថា ជុំវិញការរៀបចំគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធនេះ ជាឱកាសមួយជាពិសេសបងប្អូនជាស្រ្តី ដើម្បីទទួលយកអត្ថប្រយោជន៍ការគាំពារ ឬការផ្តល់នូវហិរញ្ញប្បទានផ្សេងៗ ក្នុងគោលដៅជំរុញឲ្យសហគ្រិនស្រ្តីឲ្យកាន់តែមាននិរន្តភាពថែមទៀត ។
លោកជំទាវបានបន្តថា ជុំវិញផែនការខាងលើ នេះគឺជាព័ត៌មានល្អ នៃការលើកកម្ពស់លទ្ធភាពរបស់អ្នកធ្វើអាជីវកម្មក្រៅប្រព័ន្ធ និងជាការបង្ហាញនូវការយកចិត្តទុកដាក់ខ្ពស់របស់រាជរដ្ឋាភិបាល នៅក្នុងអាណត្តិថ្មី នីតិកាលទី ៧ នេះ។
ជុំវិញការរៀបចំគោលនយោបាយសេដ្ឋកិច្ចក្រៅប្រព័ន្ធនេះដែរ នៅថ្ងៃទី ៣០ ខែ សីហា កន្លងមក ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានបើកកិច្ចប្រជុំលើការរៀបចំគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធជាអន្តរក្រសួង ដើម្បីពិភាក្សា និងប្រមូលធាតុចូល សម្រាប់ចងក្រងចេញជាគោលនយោបាយ ដើម្បីគាំទ្រដល់ការអភិវឌ្ឍន៍សេដ្ឋកិច្ចក្រៅប្រព័ន្ធ។
គួរបញ្ជាក់ថា នៅក្នុងអាណត្តិថ្មីនេះ រាជរដ្ឋាភិបាលនឹងដាក់ចេញកម្មវិធីគោលនយោបាយ សម្រាប់ការកសាង និងការពារមាតុភូមិឆ្នាំ ២០២៣-២០២៨ សម្រាប់សហគ្រាសធុនតូច និងមធ្យម រួមទាំងវិស័យសេដ្ឋកិច្ចក្រៅប្រព័ន្ធ តាមច្បាប់វិនិយោគថ្មី និងភាពប្រទាក់ក្រឡានៃការរៀបចំច្បាប់ស្តីពីសារពើពន្ធថ្មី ព្រមទាំងការដាក់ចេញនូវវិធានការលើកទឹកចិត្តជាក់លាក់ ដើម្បីកែលម្អបរិយាកាសធុរកិច្ចសម្រាប់សហគ្រាសធុនតូច និងមធ្យម និងការរៀបចំគោលនយោបាយ និងយុទ្ធសាស្រ្តអភិវឌ្ឍន៍សង្គមសេដ្ឋកិច្ចក្រៅប្រព័ន្ធ ជំរុញបន្ថែមដល់ការអភិវឌ្ឍន៍វិស័យកសិកម្ម, ទេសចរណ៍, សហគ្រាសធុនតូច និងមធ្យម តាមរយៈ ធនាគារសហគ្រាសធុនតូច និងមធ្យម, ធនាគារអភិវឌ្ឍន៍ជនបទ និងកសិកម្ម, ក្រុមហ៊ុនសាជីវកម្មធានាឥណទានកម្ពុជា, មូលនិធិសហគ្រិន និងមូលនិធិអភិវឌ្ឍន៍ជំនាញជាដើម៕