ផ្តាំទៅអ្នកចង់ធ្វើបាតុកម្មប្រឆាំងនឹងដំណើរ ឯកឧត្តមបណ្ឌិត ហ៊ុន ម៉ាណែត ទៅអាម៉េរិក ធ្វើម៉េចកុំឲ្យខុសច្បាប់ប្រយ័ត្នគេចាប់
កណ្ដាល៖ នាយករដ្ឋមន្រ្តី នៃកម្ពុជា ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានផ្តាំទៅជនអគតិមួយក្តាប់តូច ដែលចង់ធ្វើបាតុកម្មប្រឆាំងនឹងដំណើរទស្សនកិច្ចរបស់លោកទៅអាម៉េរិក នាចុងខែកញ្ញា ឆ្នាំ២០២៣នេះ ធ្វើយ៉ាងកុំឲ្យហួសព្រំដែនកំណត់ប្រយ័ត្នអាជ្ញាធរអាម៉េរិកចាប់។
នៅក្រុងតាខ្មៅ ខេត្តកណ្តាល នាព្រឹកថ្ងៃទី១ ខៃកញ្ញា ឆ្នាំ២០២៣នេះ ក្នុងឱកាសអញ្ជើញជួបសំណេះសំណាលជាមួយកម្មករ និយោជិតតាមរោងចក្រសហគ្រាស ឯកឧត្តម ហ៊ុន ម៉ាណែត បានលើកឡើង នាចុងខែកញ្ញា ឆ្នាំ២០២៣ខាងមុខនេះ លោកនឹងដឹកនាំគណៈប្រតិភូកម្ពុជាទៅចូលរួមមហាសន្និបាតអង្គការសហប្រជាជាតិ(UN) លើកទី៧៨ នៅទីក្រុងញូវយ៉កសហរដ្ឋអាម៉េរិក ហើយដំណើរទេស្សនកិច្ចរបស់លោកនេះ គឺមានពលរដ្ឋខ្មែរអាម៉េរិកមួយចំនួនតូច ប្រកាសប៉ុនប៉ងធ្វើបាតុកម្មប្រឆាំងនឹងដំណើររបស់លោកផងដែរ។
ទោះជាមានការប៉ុនប៉ងទុកជាមុនក្នុងការធ្វើបាតុកម្មប្រឆាំងដំណើរទស្សនកិច្ចរបស់លោក ទៅកាន់សហរដ្ឋអាម៉េរិក ពីសំណាក់ពលរដ្ឋខ្មែរមួយចំនួនតូចដែលមាននិន្នាការប្រឆាំងក្តី ក៏ឯកឧត្តម ហ៊ុន ម៉ាណែត ក៏បានអំពាវនាវ និងរំលឹកដល់បងប្អូនខ្មែរ រស់នៅក្រៅប្រទេស ជាពិសេសអាម៉េរិក និងតំបន់អឺរ៉ុបដែលគោរពស្រលាញ់លោក ក៏ដូចជាគណបក្សប្រជាជនកម្ពុជា សូមកុំធ្វើបាតុកម្មតបតនឹងពួកគេឲ្យសោះ ខណៈពួកជំទាស់មួយក្តាប់តូចទាំងនោះចង់ធ្វើអ្វីក៏ធ្វើទៅ ធ្វើយ៉ាងណា កុំឲ្យហួសព្រំដែនកំណត់របស់ប្រទេសគេបានហើយ៕