ការដាក់បញ្ហា៦ធំៗ ជាជំងឺសង្គមសម្រាប់វិញ្ញាសាអាណត្តិទី៧ ឯកឧត្ដមអភិសន្តិបណ្ឌិត ស សុខា

ភ្នំពេញ៖ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងកិច្ចប្រជុំជាមួយថ្នាក់ដឹកនាំអគ្គស្នងការដ្ឋាននគរបាលជាតិ និងបណ្ដាស្នងការដ្ឋាននគរបាលរាជធានីខេត្ត បានដាក់បញ្ហាធំៗចំនួន៦ ជាជំងឺសង្គមដើម្បីឱ្យអគ្គស្នងការដ្ឋាន និងស្នងការដ្ឋានកំណត់មុខសញ្ញាអនុវត្តកម្ចាត់ កាលពីថ្ងៃទី២៩ ខែសីហា ឆ្នាំ២០២៣កន្លងទៅនេះ ។

ជំងឺសង្គមទាំង៦នេះរួម

-បញ្ហាគ្រឿងញៀន

-ចរាចរណ៍

-ចោរកម្ម និងបទល្មើសព្រហ្មទណ្ឌផ្សេងៗ

-អំពើជួញដូរមនុស្សគ្រប់ប្រភេទ

-ការគ្រប់គ្រងក្រុមក្មេងទំនើង

-បញ្ហាតាមព្រំដែនទាំងគោក និងទឹកជាប់ជាមួយប្រទេសជិតខាង។

ឯកឧត្ដមអភិសន្តិបណ្ឌិត បញ្ជាក់ថា មានបញ្ហាច្រើនក្នុងសង្គម តែជាជំហានៗក្រសួងមហាផ្ទៃចាប់យកបញ្ហាទាំង៦នេះធ្វើជាវិញ្ញាសាសិនក្នុងអាណត្តិទី៧ ដោយដកពិសោធន៍លើប្រសិទ្ធភាពអនុវត្ត និងបទពិសោធន៍កន្លងៗទៅធ្វើជាមូលដ្ឋាន។

ឯកឧត្ដមចាត់ទុក និងសិក្សាឃើញថា បញ្ហាទាំង៦នេះ បាននិងកំពុងកើត ដោយធ្វើឱ្យប៉ះពាល់ដល់ប្រជាពលរដ្ឋ និងសង្គមជាតិទាំងមូល ប្រសិនបើមិនដាក់គោលដៅដោះស្រាយឱ្យបានទាន់ពេលវេលា ពោលគឺនឹងក្លាយជាជំងឺមហារីក។

ឯកឧត្ដមអភិសន្តិបណ្ឌិត ស សុខា ដើម្បីជាត្រីវិស័យ និងជាផែនទីបង្ហាញផ្លូវប្រតិបត្តិការ បានកំណត់ឱ្យស្នងការដ្ឋាននគរបាលទាំងអស់ ចាំបាច់ត្រូវធ្វើផែនការយុទ្ធសាស្ត្រ ផែនការសកម្មភាព…សម្រាប់អនុវត្តក្នុងឆ្នាំ២០២៤ ឱ្យបានរួចរាល់យ៉ាងយូរដើមខែតុលាការខាងនេះ៕