ក្លឹបកម្សាន្ដ ស៊ីនហាយ អគ្គីភ័យលេបត្របាក់ ស្ទើរតែទាំងស្រុង
ព្រះសីហនុ៖ ក្លឹបកម្សាន្ដ ស៊ីនហាយ (ខារ៉ាអូខេ សៀងហៃ) ត្រូវបានអគ្គិភ័យបានឆាបឆេះ ដែលស្ថិតនៅក្នុងសង្កាត់លេខ៤ ក្រុងព្រះសីហនុ ជិតរង្វង់មូលតោពីរ បណ្ដាលឱ្យខូចខាតសម្ភារៈស្ទើរតែទាំងស្រុង។
គ្រោះអគ្គិភ័យនេះបានកើតឡើងនារសៀលថ្ងៃទី៦ ខែមេសា ឆ្នាំ២០២៤។ កម្លាំងចម្រុះ មានទាំងរថយន្តពន្លត់អគ្គិភ័យរបស់ស្នងការខេត្ត អាវុធហត្ថខេត្ត ង៧០ កំពង់ផែស្វ័យត្ន ក្រុមហ៊ុនGTVC និងរថយន្តពន្លត់អគ្គិភ័យរបស់ព្រលានយន្តហោះកងកេងផងដែរ បានចូលរួមគ្នាជួយអន្តរាគមន៍ពន្លត់ភ្លើងនេះ។
សមត្ថកិច្ចបានឲ្យដឹងថា ប្រតិបត្តិការពន្លត់កម្លាំងចម្រុះបានប្រើប្រាស់ទឹកពន្លត់អគ្គិភ័យឲ្យរលត់ទៅវិញប្រើអស់ពេលប្រមាណ ៣ម៉ោង ប៉ុន្តែពុំទាន់អាចបញ្ជាក់បានពីរបាយការណ៍ជាក់លាក់ថា ទំហំនៃការឆាបឆេះនេះអស់ប៉ុន្មាន មានមនុស្សរងគ្រោះឬអត់ និងពុំទាន់អាចបញ្ជាក់ថា ការឆេះនេះបណ្តាលមកពីមូលហេតុអ្វីនៅឡើយទេ ព្រោះសមត្ថកិច្ចជំនាញកំពុងធ្វើការ។
គួររំឭកផងដែរថា កាលពីថ្ងៃទី២៩ ខែតុលា ឆ្នាំ២០២៣ ទីតាំងខារ៉ាអូខេនេះ (ស៊ិន ហាយ) បានបិទទ្វារមកទល់បច្ចុប្បន្ន ដោយសារបើកបន្ទប់ KTV ពាក់ព័ន្ធនឹងគ្រឿងញៀនជាដើម ហើយពេលនោះសមត្ថកិច្ចបានឃាត់ខ្លួនជនសង្ស័យដែលពាក់ព័ន្ធថ្នាំញៀន និងវត្ថុតាងបញ្ជូនទៅតុលាការផងដែរ៕
Images