ក្រោយភ្លៀងធ្លាក់ខ្លាំង ! ប្រទេស បូលីវី ប្រកាសដាក់រដ្ឋក្នុងគ្រាអាសន្ន

បូលីវី៖ ភ្លៀងធ្លាក់ខ្លាំងនៅក្នុងរដ្ឋធានីឡាប៉ាស់ (La Paz) របស់ប្រទេសបូលីវី បានជំរុញឲ្យក្រុមអាជ្ញាធរប្រកាសដាក់ប្រទេសក្នុងគ្រាអាសន្ន បន្ទាប់ពីទឹកក្នុងទន្លេហក់ឡើងប្រៀបច្រាំងបំផ្លាញលំនៅឋានជាច្រើនខ្នងកាលពីចុងសប្ដាហ៍នេះ នេះបើយោងតាមឯកសាររដ្ឋាភិបាលបានបង្ហាញកាលពីថ្ងៃអាទិត្យ ។

យោងតាមឯកសារខាងលើ លោក ល្វីស អាសេ(Luis Arce) ប្រធានាធិបតីបូលីវី បានសន្យាបញ្ជូនគ្រឿងចក្រធុនធ្ងន់ និងទាហានចំនួន៣ពាន់នាក់ ដើម្បីទប់ស្កាត់ការបំផ្លិចបំផ្លាញបន្ថែមទៀត ។

ភ្លៀងធ្លាក់ខ្លាំង បានបង្កឲ្យមានទឹកជំនន់ នៅក្នុងភូមិឋានមួយចំនួន និង កាត់ផ្ដាច់ទំនាក់ទំនងតំបន់មួយជាច្រើនទៀតនៅក្នុងទីក្រុងនេះ ព្រមទាំងកាត់ផ្ដាច់ចរន្តអគ្គិសនី និងជន់លិចផ្លូវផងដែរ។

លោកអាសេ បានថ្លែងនៅលើបណ្ដាញសង្គម Xថា យើងបារម្ភជាខ្លាំង ចំពោះស្ថានភាពដ៏លំបាកដែលទីក្រុងឡាប៉ាស់ កំពុងជួបប្រទះ។

យោងតាមទិន្នន័យ មនុស្សម្នាក់បានស្លាប់ កាលពីចុងសប្ដាហ៍មុនក្នុងទីក្រុងឡាប៉ាស់ ដោយសារភ្លៀងធ្លាក់ខ្លាំង ខណៈមនុស្សជិត៥០នាក់បានស្លាប់ ក្នុងទឹកជំនន់ទូទាំងប្រទេសចាប់តាំងពីរដូវភ្លៀងធ្លាក់បានចាប់ផ្ដើមកាលពីខែមករា ៕