អាល់ហ្សេរី៖ ប្រទេសនីហ្សេទទួលយកការសម្រុះសម្រួលរបស់ខ្លួន ក្នុងការដោះស្រាយវិបត្តិនយោបាយ

នីហ្សេ៖  ប្រទេសនីហ្សេ បានទទួលយកការផ្តល់ជូនរបស់អាល់ហ្សេរីក្នុងការសម្រុះសម្រួលក្នុងវិបត្តិនយោបាយរបស់ខ្លួន រយៈពេល៥សប្តាហ៍បន្ទាប់ពីប្រទេសអាហ្វ្រិកខាងជើងនេះ បានស្នើសុំដំណើរការស្តារស្ថានភាពឡើងវិញរយៈពេល៦ខែ ដែលដឹកនាំដោយជនស៊ីវិលម្នាក់ នេះបើយោងតាមក្រសួងការបរទេសរបស់ប្រទេសអាល់ហ្សេរី បាននិយាយកាលពីថ្ងៃចន្ទ។

ប្រទេសអាល់ហ្សេរី បានទទួលការជូនដំណឹងជាផ្លូវការរបស់នីហ្សេ អំពីការទទួលយករបស់ខ្លួននូវគំនិតផ្តួចផ្តើមសម្របសម្រួលរបស់លោកប្រធានាធិបតី អាប់ឌែលម៉ាដជីដ តេបបោន (Abdelmadjid Tebboune) បើតាមក្រសួងបាននិយាយនៅក្នុងសេចក្តីថ្លែងការណ៍មួយ។

ពុំមានការអត្ថាធិប្បាយភ្លាមៗពីរបបយោធា ដែលកំពុងកាន់អំណាចរបស់នីហ្សេទេ។ ប្រទេសអាល់ហ្សេរីបានព្រមានម្តងហើយម្តងទៀតប្រឆាំងនឹងការឆ្លើយតបខាងយោធាចំពោះវិបត្តិ នៅក្នុងប្រទេសនីហ្សេជិតខាង ដែលឆ្មាំប្រធានាធិបតី បានដណ្តើមអំណាច និងបង្កើតរបបយោធា កាលពីខែកក្កដា ដោយនិយាយថា ខ្លួនចង់បានដំណើរការស្តារស្ថានភាពឡើងវិញ រយៈពេលបីឆ្នាំ។

កាលពីចុងខែសីហា រដ្ឋមន្ត្រីការបរទេសអាល់ហ្សេរី លោក អាម៉េដ អាតតាហ្វ (Ahmed Attaf) បានថ្លែង អាល់ហ្សេរី បាននិយាយជាច្រើនដងទៅកាន់មេដឹកនាំយោធារបស់នីហ្សេ ហើយបានស្នើឲ្យមានការផ្តួច  ផ្តើមគំនិត ដើម្បីធ្វើឲ្យប្រទេសនេះវិលត្រឡប់ទៅការរៀបចំឲ្យមានសណ្តាប់ធ្នាប់តាមធម្មនុញ្ញធម្មតាវិញ៕